Hélt alltaf í vonina

„Þegar maður getur ekki einu sinni brosað þá reynir maður það samt," segir Eiríkur Ingi Jóhannsson sem komst einn lífs af þegar togarinn Hallgrímur sökk við Noregsstrendur í síðustu viku. Þrír menn fórust í slysinu. Eiríkur var í ítarlegu viðtali við Kastljósið á RÚV um lífsreynslu sína í kvöld. Þar sagði hann að börnin hefðu verið honum ofarlega í huga þegar hann áttaði sig á því að hann væri í lífshættu.

Eiríkur Ingi sagði í viðtalinu að hann hefði haldið í vonina um að þyrla kæmi til að bjarga áhöfn Hallgríms. Hann fylltist síðan ótta þegar að þyrlan sveimaði yfir honum en hann hélt að hún myndi ekki finna sig. Í viðtalinu lýsti hann síðan fögnuðinum þegar hann sá að sigmaður úr þyrlunni hefði fundið hann og hann væri á leið heim.

Eiríkur Ingi hefur þegar rætt við Rannsóknarnefnd sjóslysa, en formaður nefndarinnar, sagði í hádegisfréttum Bylgjunnar í fyrradag að Hallgrímur hafi verið í góðu ástandi þegar skipið hélt í sína síðustu ferð til Noregs.