Helmingurinn látinn sæta geðrannsókn

Alls hafa 22 dómar fallið í Hæstarétti frá stofnun hans árið 1920 til 23. apríl 2012 þar sem ákært var fyrir kynferðisbrot gegn dreng. Sakfellt var í miklum meirihluta málanna, eða 18 af 22, og voru brotaþolar samtals 44. Gerandi var látinn sæta geðrannsókn í átta dómum.

Í málunum eru alls 16 gerendur, allt karlmenn. Þar af er Steingrímur Njálsson gerandi í þremur. Einungis tveir þeirra sögðust sjálfir hafa verið þolendur kynferðisofbeldis í æsku.

"Í dómi frá 1994 kemur fram að ákærði hafi verið fórnarlamb Steingríms Njálssonar er hann var 14 ára og í öðru máli frá 2001 upplýsir gerandi í viðtali við geðlækni að hann hafi orðið fyrir kynferðisofbeldi af hálfu unglingspilts þegar hann var barn að aldri," segir í niðurstöðum viðamikillar rannsóknar Svölu Ísfeld Ólafsdóttur, dósents við lagadeild Háskólans í Reykjavík, á öllum dómum Hæstaréttar á fyrrgreindu tímabili.

Samkvæmt skoðun á dómunum virðast drengir vera líklegri til að vera misnotaðir kynferðislega af ókunnugum, en þolandi þekkti ekki ofbeldismanninn í meira en helmingi tilvika. Í rúmlega 40 prósentum tilvika var um endurtekið brot að ræða.

Flest brotin áttu sér stað á heimili ofbeldismannsins, á vinnustað hans eða í bifreið á hans vegum.