Báðu móður fíkils að leyna samkomulagi

Smálánafyrirtækið Kredia lokaði lánareikningi 21 árs manns að tilstuðlan móður hans. Þjónustufulltrúi Kredia bað þó móður mannsins, Dagbjörtu Steindórsdóttur, að láta hann ekki vita af fyrirkomulaginu.

Hún bað fyrirtækið um að fella niður skuldir sonar síns í ljósi ákvörðunar fyrirtækjanna um að fella niður skuldir geðfatlaðra einstaklinga, en sonur hennar dvelur nú á Vogi í áfengis- og fíkniefnameðferð. Kredia varð ekki við bón konunnar, en bauðst til að loka á viðskipti mannsins eins og áður sagði.

„Hins vegar, ef þú vilt, getum við lokað á reikningsviðskipti [sonar þíns] þannig að hann eigi ekki kost á lántöku hjá okkur. Best er þá að þú greinir [honum] ekki frá því fyrirkomulagi því annars getum við ekki staðið á með lokunina,“ segir í tölvupósti frá Krediu til Dagbjartar. Í öðrum tölvupósti segir svo að beiðni hennar hafi verið afgreidd.

Í svari Kredia kom einnig fram að niðurfellingarnar séu einungis bundnar við þá sem séu skilgreindir geðfatlaðir af geðlæknum og geti sýnt fram á vottorð þar um. Hún hafði einnig samband við Hraðpeninga, sem gáfu sér fjórar vikur til að svara. Sonur hennar skuldar um hálfa milljón króna hjá fyrirtækjunum tveimur.

„Alkóhólismi er geðsjúkdómur. Hvers vegna er þá ekki hægt að senda vottorð frá Vogi til að fá skuldir þeirra sjúklinga felldar niður?“ spyr Dagbjört. „Það er eitthvað bogið við að þegar ungt fólk borgar ekki skuldir sínar lendi það í snörunni hjá þessum fyrirtækjum.“

Þórarinn Tyrfingsson, yfirlæknir á Vogi, segir réttindi alkóhólista illa tryggð í samfélaginu.

„Réttur þeirra er að engu tryggður og það hefur lengi verið þannig,“ segir hann. „Menn hafa skrifað undir skuldbindingar undir áhrifum sem þeir geta ekki staðið undir. Þegar þær upplýsingar liggja fyrir ætti ráðgjafinn að tryggja rétt þess fólks og smálánafyrirtækin ættu að fella niður þessar skuldbindingar séu útgefin vottorð frá fagaðilum.“

Haukur Örn Birgisson, lögmaður Útlána, samtaka smálánafyrirtækja, svaraði ekki spurningum Fréttablaðsins í gær.