Beggi og Pacas í skýjunum eftir að ljóninu var skilað - "Ást, ást, ást“

Óprúttnir aðilar sem stálu níðþungri styttu af ljóni úr garði tveggja Garðbæinga í sumar sáu að sér þegar jólin gengu í garð og skiluð þýfinu. Þakklæti er eigendunum efst í huga en þeir grétu af gleði við heimkomu ljónsins og hafa ekki getað hætt að faðma það.

Ljónið er í eigu Begga og Pacas en parið kom því fyrir uppi á stalli í heimreiðinni þegar þeir fluttu inn í hús sitt að Hrauntungu við Álftanesveg í maí síðastliðnum.

„Svo lendum við bara í því um mitt sumar að þá höfðu einhverjir komið hérna og tekið ljónið um miðja nótt. Við vorum ofsalega sárir og okkur leið illa í hjartanu. Auðvitað reyndum við að leita út um allt og ennþá á Þorláksmessu, þegar Pacas fór í skötu, hann elskar skötu, þá kom hann heim og sagði: Ég er ennþá að sakna ljónsins. Ég hef alltaf sagt að ég sé það alltaf fyrir mér að ljónið muni koma heim aftur," segir Beggi.

„Ég ætla að nýta þetta tækifæri og þakka þeim fyrir sem tók það að skila því til baka," segir hann.

„Við erum svo hamingjusamir þú sérð það, þetta er alveg eins og við höfum verið að fá lottóvinning okkur líður svo vel. Þetta eru eiginlega bestu jólin mín á ævi minni því ég á dóttur í námi í Ameríku sem bankaði bara óvænt upp á hjá mér í síðustu viku og þá grenjaði ég í fimm tíma og nú kemur ljónið á jóladag og þá græt ég. Hvað verður næst, ég er svo þakklátur það er ekki hægt að vera þakklátari," segir Beggi.

„Love, love love," segir Pacas.

„Þetta er ást bara, ást ást ást," segir Beggi.