Sigur fyrir Subway snæðandi stúdenta: BMT framlengdur til 15. desember

Skyndibitakeðjan Subway hefur ákveðið að framlengja bát nóvember-mánaðar, ítalska BMT-bátinn, til 15. desember. Jafnframt mun Subway bjóða upp á túnfiskbát sem bát mánaðarins í desember, eins og áður var ákveðið.

Þetta gerir Subway í framhaldi af kröfum frá Sambandi íslenskra Subway snæðandi stúdenta (SÍSSS) sem mótmælti því á Facebook að bátur desember-mánaðar yrði túnfiskbátur, en sambandið telur þann bát ekki henta stúdentum sem nú eru að læra undir próf.

Gunnar Skúli Guðjónsson, framkvæmdastjóri Subway á Íslandi, sagði við Vísi fyrr í dag að málið yrði rætt í stjórninni í dag.

Það hefur verið gert og var niðurstaðan sú að framlengja nóvember-bátinn fram til 15. desember til að koma til móts við námsmenn í prófum „enda eru námsmenn einn mikilvægasti viðskiptavinahópur okkar á Íslandi. Subway er umhugað um heilsu og líðan námsmanna og er því bæði ljúft og skylt að koma til móts við þeirra þarfir og væntingar," segir hann.

Hann vonar að stúdentar séu sáttir með þessa niðurstöðu, og óskar öllum námsmönnum góðs gengis í prófunum.