Námsmenn ósáttir við bát mánaðarins

Samband íslenskra Subway snæðandi stúdenta (SÍSSS) sendir frá sér ályktun á Facebook-síðu sinni í dag en þar harmar félagið þá ákvörðun Subway að gera túnfiskbátinn að báti mánaðarins í desember. Í hverjum mánuði býður Subway upp á svokallaðan bát mánaðarins en verðið á honum er töluvert lægra en á öðrum bátum.

Sambandið, sem er eflaust sett fram í gríni, skorar á Subway að endurskoða ákvörðun sína og bjóða nemendum upp á betri bát. „Þetta þykir okkur mjög miður, enda er um nemendur á grunn-,framhalds- og háskólastigi sem nýta sér þetta geysivinsæla tilboð hvað mest og er það vægast sagt fyrir neðan allar hellur að bjóða þeim upp á jafn óvinsælan bát um þær mundir sem þeir eru að fara ganga í gegnum erfiðistu þrautraunir annarinnar," segir í ályktuninni.

„Er því löngu kominn tími til að fyrirtæki eins og Subway átti sig á því hvar straumurinn liggi í bátavali og bjóði nemum upp á skárri kost nú þegar fáir vita gott betra en að skjótast á næsta Subway stað, fá sér bát mánaðarins í flýti og svo strax aftur í prófalestur," segir ennfremur í ályktuninni.

Sambandið segir að ef Subway endurskoðar ákvörðun sína væri fyrirtækið að þjóna sínum stærsta markhóp, sem reiðir sig hvað mest á bát mánaðarins „en jafnframt væru þeir að sinna sínu samfélagslega hlutverki sem þeir gegna í samfélaginu sem vinsælasti samlokustaður Íslands."

Hér má nálgast Facebook-síðu hópsins.