Hyggst senda borskip á Jan Mayen-hrygginn

Olíustofnun Noregs hefur leigt tvö skip til hljóðbylgjumælinga á Jan Mayen-hryggnum í sumar og hyggst í framhaldinu senda borskip þangað til rannsóknarborana þarnæsta sumar.

Olíustofnunin tilkynnti í vikunni um leigu rannsóknarskipanna fyrir þrjá og hálfan milljarð króna en skipin verða einnig notuð við mælingar í Barentshafi. Rannsóknir Norðmanna á Jan Mayen-hryggnum eru gerðar í samstarfi við íslensk stjórnvöld og koma Íslendingum til góða, enda ná þær inn í íslenska lögsögu og taka til þess svæðis í norsku lögsögunni sem Íslendingar eiga nýtingarrétt á.

Þær koma í framhaldi af ítarlegum rannsóknum síðastliðið sumar en niðurstöður þeirra reyndust mun jákvæðari en búist var við og hafa norskir fjölmiðlar sagt að þær gefi vonir um miklar olíulindir. Það er svo enn til marks um þá trú sem sérfræðingar Olíustofnunar Noregs hafa á svæðinu að stofnunin áformar að ráðast í boranir þar sumarið 2013 og leigja til þess borskip.

Slík skip hafa raunar tvívegis áður borað rannsóknarholur á Jan Mayen-hryggnum, fyrst Glomar Challenger árið 1974 og síðan Joides Resolution, árið 1995, en líklegt er að næsta borskip verði í líkingu við það sem er hér á myndinni að ofan.