Hjólreiðamenn mega ekki tala í farsíma

Samkvæmt frumvarpi til nýrra umferðarlaga verður hjólreiðamönnum óheimilt að hjóla og tala á farsíma á sama tíma. Frumvarpið er nú til meðferðar á Alþingi.

Samkvæmt gildandi umferðarlögum er ökumönnum vélknúinna ökutækja óheimilt að nota farsíma við akstur. Hin væntanlegu umferðarlög fela í sér breytingu þess efnis að nú verður ökumönnum ökutækja almennt óheimilt að nota farsíma við akstur. Vegna þess að reiðhjól eru skilgreind sem ökutæki í umferðarlögum felur breytingin í sér að hjólreiðamenn mega ekki nota farsíma á ferð.

Ekki kemur fram hver viðurlög verða fyrir hjólreiðamenn sem brjóta reglurnar í frumvarpinu. Viðurlögin munu að öllum líkindum koma fram í reglugerð sem sett verður síðar. Nú er í gildi slík reglugerð um sektir og viðurlög og ef frumvarpið nær brautargengi má vænta breytinga á henni sem tekur hjólreiðamenn inn í myndina.

Breytingar til bóta

Umhverfis- og samgöngunefnd Alþingis hefur frumvarpið nú til umsagnar og hefur óskað eftir umsögnum ýmissa aðila, m.a. Umferðarstofu.

„Þessi breyting á alveg hiklaust erindi í umferðarlög. Það er okkar mat hjá Umferðarstofu," segir Einar Magnús Magnússon, upplýsingafulltrúi Umferðarstofu. Hann telur rétt að líta til nágrannaþjóða okkar til samanburðar. „Þar hafa menn töluverðar áhyggjur af þessu. Danir skilgreina þetta t.d. sem vandamál og eru að ráðast í að uppræta það."

Þó hjólaumferð sé nokkuð frábrugðin hér á landi miðað við Danmörku telur Einar vandamálið jafnalvarlegt hér á landi þar sem menn hjóla jafnt innan um vélknúin ökutæki í umferðinni sem og gangandi vegfarendur. Hann segir rannsóknir sýna að menn séu svo viðutan og athyglislausir þegar þeir tala í síma undir stýri að undrum sæti. „Og það getur skapað mikla hættu, hvort heldur sem er á reiðhjóli eða öðru ökutæki," segir hann.