Ekki næg mataraðstoð fyrir alla

Fjölskylduhjálp Íslands úthlutaði mataraðstoð í dag. Fjögur hundruð aðstoðarpökkum var dreift en þegar þeim hafði verið komið út voru enn um hundrað manns eftir sem urðu tómhentir frá að hverfa.

Framkvæmdastjóri Fjölskylduhjálparinnar, Ásgerður Jóna Flosadóttir, segir að þeim fjölgi stöðugt sem þurfa aðstoð en komast ekki að. Hún telur það til marks um að fátækt sé að aukast. Allar líkur eru á því að eftirspurnin eftir mataraðstoð aukist talsvert í jólamánuðinum og Ásgerður segir að nauðsynlegt sé að fá stuðning frá ríkinu svo hægt sé að standa undir eftirspurninni.

„Okkur fannst þetta mjög leiðinlegt í dag, en við höfðum bara ekki bolmagn til að gefa fleiri matarpakka," segir Ásgerður Jóna Flosadóttir, framkvæmdastjóri Fjölskylduhjálpar Íslands. Stefnt er að því að útvega fleiri matarpakka og fólki sem ekki komst að í dag hefur verið boðið að koma aftur á morgun til að þyggja mataraðstoð.

Að sögn Ásgerðar hefur komið fyrir áður að fólk fái ekki aðstoð hjá Fjölskylduhjálpinni en hún telur það hafa aukist smátt og smátt. Hún telur þetta til marks um að meiri fátækt í samfélaginu. Hún segir að fólk reyni almennt að bera sig vel en þegar jólin nálgast leiti sífellt fleiri á náðir Fjölskylduhjálparinnar.

„Núna í desember verður alger sprengja," segir hún og er hrædd um að Fjölskylduhjálpin nái ekki að standa undir eftirspurninni og aðstoða alla sem þurfa. „Við fáum að öllum líkindum ekkert frá ríkinu. Og við fáum eina og hálfa milljón frá borginni, en við báðum um tíu," segir Ásgerður