Obama hótar nú hernaði í Sýrlandi

Beiti Sýrlandsstjórn efnavopnum í stríði sínu gegn uppreisnarmönnum, þá fer hún yfir strikið að mati Bandaríkjaforseta. Rússar enn andvígir íhlutun.



Barack Obama segir að það hefði „gríðarlegar afleiðingar“ ef Sýrlandsstjórn tæki til við að nota efnavopn gegn uppreisnarmönnum í landinu. „Það myndi breyta útreikningum mínum verulega,“ sagði Obama á mánudagskvöld.

Þetta er í fyrsta sinn sem Obama hótar hernaði gegn Sýrlandi. Hann tók þó fram að hann hefði ekki falið Bandaríkjaher að búa sig undir íhlutun, en sagði að þessi hótun gilti jafnt um uppreisnarmenn eða aðra sem tækju upp á því að beita efnavopnum: „Við höfum komið því skýrt á framfæri við alla aðila í þessum heimshluta, að þetta sé rauða strikið, og að það hefði gríðarlegar afleiðingar ef við færum að sjá einhverjar tilfæringar með efnavopn, eða beitingu efnavopna.“

Bandaríkin hafa ítrekað krafist þess að Bashar al Assad Sýrlandsforseti segi af sér. Þau hafa samt til þessa verið andvíg hernaðaríhlutun í Sýrlandi, að hluta vegna þess að slík íhlutun gæti orðið til þess að magna átökin og draga enn frekar úr líkunum á pólitískri lausn.

Öryggisráð Sameinuðu þjóðanna hefur ekki getað komið sér saman um afstöðu í málinu.

Rússar ítrekuðu síðan í gær andstöðu sína við alla erlenda íhlutun í málefni Sýrlands: „Það eina sem erlendir aðilar ættu að gera er að skapa aðstöðu til þess að viðræður hefjist,“ sagði Sergei Lavrov, utanríkisráðherra Rússlands, daginn eftir að Bandaríkjastjórn viðraði í fyrsta sinn möguleikann á hernaðaríhlutun.

Sýrlandsstjórn viðurkenndi í fyrsta sinn í síðasta mánuði að hún hefði yfir efnavopnum að ráða, en sagði jafnframt að þeim yrði einungis beitt gegn erlendu innrásarliði, ekki gegn heimamönnum.

Sýrlensk stjórnvöld hafa hins vegar ítrekað sagt hryðjuverkamenn standa að baki uppreisninni í Sýrlandi. Óljóst er af orðum stjórnvalda hvort hún myndi grípa til vopna gegn bardagasveitum erlendra íslamista, sem taldar eru hafa blandað sér í einhverjum mæli í átökin.

Hörð átök geisa enn í Sýrlandi. Í gær féllu tugir manna, þar á meðal japönsk fréttakona sem var að fjalla um átökin í Aleppo, stærstu borg landsins.

Í nágrannalandinu Líbanon eru átök einnig tekin að brjótast út milli stuðningsmanna stjórnar Assads og andstæðinga hennar.

gudsteinn@frettabladid.is