Má ekki kaupa áfengan orkudrykk en heimilt að blanda orkudrykk við áfengi

EFTA dómstóllinn dæmdi á dögunum að ÁTVR, eða Vínbúðinni, hefði verið heimilt að hafna sölu á áfengum drykkjum sem innihéldu koffín. Það var fyrirtækið Vín Tríó ehf, sem kærði málið hér heim en Héraðsdómur Reykjavíkur óskaði eftir ráðgefandi áliti dómstólsins vegna álitaefnisins.

Vín Tríó vildi að Vínbúðin tæki drykkinn Mokai Cider til reynslusölu en því var hafnað á þeim grundvelli að drykkurinn innihélt koffín. Vínbúðin sagði svo upp vörukaupasamning við fyrirtækið og hætti í kjölfarið að selja drykkinn Cult Shaker sem hafði verið fáanlegur í vínbúðum frá árinu 2006. Ástæðan var sú sama, það var of mikið koffín í drykknum.

Báðar ákvarðanirnar voru byggðar á reglum sem veita ÁTVR heimild til að hafna sölu á vöru sem inniheldur koffín eða önnur örvandi efni. Vísað var til rannsókna sem bentu til að neysla áfengis, blönduðu örvandi efnum, gæti leitt til aukinnar ölvunar, einkum meðal yngri aldurshópa. Efnin hefðu þau áhrif að neytandinn yrði síður var við ölvun sína og væri líklegri til þess að neyta áfengis í ríkari mæli og auka þar með hættuna á alvarlegum afleiðingum.

Vín Tríó stefndi í kjölfarið íslenska ríkinu og fór fram á að úrskurðurinn yrði felldur úr gildi. Héraðsdómur Reykjavíkur ákvað að leita eftir ráðgefandi áliti EFTA-dómstólsins.

EFTA dómstólinn komst að þeirri niðurstöðu að ÁTVR væri heimilt að slíta samningnum í ljósi þess að engar samsvarandi innlendar framleiðsluvörur eru til sölu hér á landi, og að bannið er ekki til þess gert að vernda slíkar vörur með einhverjum hætti.

Þess má geta að EFTA-dómstóllinn hafnaði þeirri staðhæfingu að bjór og aðrir áfengir gosdrykkir, sem innihalda ekki örvandi efni, og gosdrykkir sem innihalda koffín og er venjulega blandað við áfengi, væru í reynd í samkeppni við áfenga drykki sem innihalda örvandi efni.

Að mati dómsins væru slíkar vörur ekki ætlaðar sama neytendahópi. Það er sem sagt hægt að blanda orkudrykk út í áfengi þó að Vínbúðin neiti að selja áfengan orkudrykk.