Hugleiðir oft í flugi

Hera Björk Þórhallsdóttir, söngkona er í hamingjuhorni Lífsins þessa vikuna. Hún finnur hamingju og ró meðal annars í garðinum og bílskúrnum.

Hvað gerir þú til að tæma hugann eftir erfiða vinnuviku?

Mér finnst óskaplega gott að fara út að ganga en það sem veitir mér fullkomna hamingju og ró er að skella mér í garðinn eða bílskúrinn og dúlla mér.

Hvernig hleður þú batteríin?

Ég hleð batteríin úti í náttúrunni og þá helst á litla „Southforkinu" okkar fyrir norðan. Þar get ég skottast um heilu og hálfu dagana drullug upp fyrir haus í sumarkjól, lopasokkum og gúmmískóm. En svo er fólkið mitt og vinir alveg ómetanleg „hleðslutæki".

Hugleiðir þú eða notar þú aðrar aðferðir til að rækta hugann?

Ég veit að ég er það sem ég hugsa þannig að ég reyni að beina huganum og athyglinni í réttan farveg á hverjum degi. Auðvitað gengur það misvel dag frá degi en æfingin skapar meistarann. Annars nota ég tímann vel þegar ég er á ferðalögum og nota hugleiðslu oft þegar ég sit í flugvélum. Fæ yfirleitt mínar bestu hugmyndir einmitt upp í háloftunum.

Viltu deila með okkur uppáhalds hamingjumolanum þínum/tilvitnun?

Mín uppáhaldstilvitnun og lífsmottó er: „Allt sem þú veitir athygli vex og dafnar, jafnt fegurstu blóm sem og illgresi." Hann Guðni meistari í RopeYoga Setrinu gaukaði að mér þessum sannleika rétt áður en ég fór til Danmerkur 2009 til að keppa í Eurovision fyrir þeirra hönd. Eins gaf hann mér aðra gjöf í formi visku þegar hann rétti mér blað með tilvitnunum frá þýska meistaranum Goethe sem enn hangir á ískápnum mínum! Þar stendur eftirfarandi: „Until one is committed, there is hesitancy - the will to draw back, always ineffect­iveness". Fyrir mér er þetta það sem lífið snýst um, að hika ekki heldur heitbinda sig sjálfum sér og sínum, vinunum, vinnunni, heilsunni, ástinni og svo framvegis.

Hvernig ræktar þú hjónabandið? Þessu er auðvelt að svara: Ég veiti því alla mína athygli. Það er svo gott að elska, eins og meistari Bubbi sagði svo réttilega, að maður verður að stunda það af miklum móð með bros út um allt andlit.

Og að lokum, heldurðu að Gréta og Jónsi komist áfram í Eurovision?

Já, ekki efakorn í mínum huga að þau eiga eftir að fara áfram, og svo lengra ef út í það er farið. Ef vindáttirnar verða réttar þann 26. maí og þau ná að fanga Evrópu með ástríðu sinni og einlægni, þá held ég að við gætum alveg þurft að halda „Evrópumeistarakeppni lagahöfunda og flytjenda" hér að ári. Sem sagt: Gleðilegt Eurovision og farsælt komandi ár.