María Birta rekin úr Kringlunni - "Eins skitin framkoma og mögulegt er“

„Þetta er náttúrulega eins skitin framkoma og mögulegt er," segir María Birta Bjarnadóttir, eigandi fata- og skóverslunarinnar Maníu.

Forsvarsmenn rekstrarfélags Kringlunnar tilkynntu Maríu Birtu í dag að hún þyrfti að loka Jólamarkaði sínum sem hún kom á fót í verslunarmiðstöðinni eftir að bruni kom upp í húsnæði Maníu að Laugavegi 51 á dögunum.

Einstaklingur bauðst til að skjóta skjóli yfir Jólamarkaðinn í Kringlunni, Maríu Birtu að kostnaðarlausu. Hún þáði boðið og opnaði markaðinn í gær. Stuttu seinna fékk Kringlan á sig skaðabótakröfu frá nokkrum verslunarmönnum. Því var haldið fram að Jólamarkaðurinn væri í raun útsala og sem slík væru hún ólögleg á þessum tíma.

„Þetta er skilgreining sem Neytendastofa setur," segir Sigurjón Örn Þórsson, framkvæmdastjóri Rekstrarfélags Kringlunnar. „Þegar meirihluti eða allar vörur eru á niðursettu verði."

María Birta gefur lítið fyrir þessar fullyrðingar.

„Rekstrarfélagið vill ekki hafa mig í Kringlunni. Þetta er Jólamarkaður, ekki útsala," segir María Birta. „Þannig að ég þarf að flytja á morgun."

Allt tiltækt slökkvilið var kallað að Laugavegi 51 þegar eldur kom þar upp á annarri hæð um síðustu helgi. Mikil hætta myndaðist enda voru tvær manneskjur á þriðju og fjórðu hæð hússins sem lögreglan þurfti að bjarga. Þá stóð María Birta, starfsmenn hennar og annað verslunarfólk á Laugaveginum í ströngu við að tæma verslun hennar sem er á jarðhæð hússins.

„Þessi vika er búin að vera hræðileg. Ég grét fyrir framan þennan mann frá Kringlunni. Það eina sem ég gat sagt var „Gleðileg jól" og „bless"."

Sigurjón segir ákveðnar reglur gilda um rekstur Kringlunnar og nauðsynlegt sé að fylgja þeim. „Því miður kom þessi staða upp," segir hann.

Þá bendir Sigurjón á að Reitir, eigandi Kringlunnar, hafi boðið Maríu Birtu húsnæði Iðu-hússins við Lækjargötu, án endurgjalds.

„Ég hef ekkert heyrt frá þeim varðandi það," segir María Birta. „Það væri fallegt af þeim en ég hef ekki heyrt af slíku boði."