Íslenska konan lá í 40 mínútur í ísköldu vatninu á Nörrebro

Íslenska konan sem liggur nú í öndunarvél á gjörgæsludeild Rigshospitalet í Kaupmannahöfn lá í 40 mínútur undir brú í ísköldu Peblinge vatninu á Nörrebro áður en henni var bjargað. Þetta kemur fram í frétt TV2 um málið. Þar segir að konan þjáist af alvarlegri ofkælingu.

Lögreglan í Kaupmannahöfn þurfti að kalla út björgunarþyrlu með tveimur köfurum um borð til að bjarga konunni upp úr Peblinge vatninu sem liggur í miðju Nörrebro hverfinu. Konan liggur nú í öndunarvél á gjörgæsludeild og er talin í lífshættu. Þetta kemur fram í frétt TV2 um málið. Þar segir að konan þjáist af alvarlegri ofkælingu.

Konan og íslenskur maður sem var með henni eru bæði 27 ára gömul. Þau féllu bæði í vatnið af Dronning Louise brúnni á fimmta tímanum í nótt. Raunar mun maðurinn hafa stokkið á eftir henni til að reyna að koma henni til bjargar. Vitni að þeim atburði hringdu í neyðarlínuna. Lögreglumaður sem fyrstur kom á vettvangi bjargaði manninum á þurrt.

Hinsvegar gekk erfiðlega að finna konuna þar sem hana hafði borið undir brúna. Þar hélt hún sér á floti inn í röri sem liggur undir brúnni. Kafararnir fundu hana að lokum í rörinu og var hún hífð um borð í þyrluna sem flutti hana á gjörgæsludeild.

Kristian Levy sem stjórnaði björgunaraðgerðunum segir að konan hafi verið með meðvitund þegar hún fannst en var orðin svo máttfarin að hún gat ekki látið heyra í sér.

Ekkert amar að manninum en hann var verulega ölvaður eins og einn af varðstjórum lögreglunnar í Kaupmannahöfn orðar það.