Svona var bak við tjöldin í hljóðverinu

Fjórtán af færustu söngvurum Íslands voru fengnir til að gera sem glæsilegast lag FM Belfast fyrir Dag rauða nefsins. Vísir fékk að skyggnast bak við tjöldin á tökunum þar sem góð stemmning og samhugur réðu ríkjum. Árni Vilhjálmsson í FM Belfast bregður sér hér í hlutverk þáttastjórnanda og spyr listamennina sem tóku þátt spjörunum úr. Lagið heitir Öll í kór og verður myndband við það frumsýnt seinna í vikunni. Á föstudaginn verður glæsileg skemmtidagskrá í opinni dagskrá á Stöð 2 og hér á Vísi í tilefni Dags rauða nefsins. Vísir mun einnig í vikunni frumsýna myndbönd frá ferð Gunnars Hanssonar leikara á vegum Unicef þar sem hin landskunni sjónvarpsmaður Frímann Gunnarsson fer á kostum. Gestasöngvarar í laginu Öll í kór eru: Ásgeir Trausti, Diddú, Helga Möller, Hugleikur Dagsson, Jóhann Helgason, Lay Low, Ólöf Arnalds, Prinspóló, Sigríður Thorlacius, Snorri Helgason, Sóley, Steindi Jr., Steini í Hjálmum og Valdimar. Allir sem komu að gerð lagsins gáfu vinnu sína. Textann við lagið gerði Örvar Þóreyjarson Smárason. Í honum er meðal annars sungið um það hvernig fólk er á endanum allt eins. "Komdu með, við erum eins, þú mátt ekki gleyma að á endanum erum við eins – þú og ég,“ segir meðal annars í textanum. Þetta er í fyrsta skipti sem FM Belfast syngur á íslensku.