Ætla að kvikmynda þríleik Jóns Kalmans

Sænska kvikmyndafyrirtækið Cap Horn Film AB og Kvikmyndafélagið Hughrif ehf. tryggðu sér fyrir stuttu kvikmyndaréttinn á þríleik Jóns Kalmans Stefánssonar sem samanstendur af Himnaríki og helvíti, Harmi englanna og Hjarta mannsins gefnum út af Bjarti.

Og það er enginn aukvisi sem heldur um taumana. Gunnar Carlsson, eigandi hins nýstofnaða fyrirtækis Cap Horn Film AB, hefur áralanga reynslu í norrænum kvikmyndaiðnaði.

Hann starfaði lengi hjá sænsku ríkissjónvarpstöðinni SVT og á þeim tíma var hann einn af framleiðendum á Millennium þríleiknum, þar að auki var hann einn af framleiðendum á Antichrist og Manderlay í leikstjórn Lars von Triers. Hann var einnig framleiðandi sérkennilegu vampíruhrollvekjunnar Låt den rätte komma in í leikstjórn Tomas Alfredson sem og á After the Wedding í leikstjórn Susanne Bier, sem síðast hlaut óskarsverðlaun fyrir bestu erlendu myndina árið 2011.

Þar fyrir utan hefur Gunnar einnig verið meðframleiðandi á fjölda íslenskra kvikmynda.

Í tilkynningu frá Bjarti segir að fyrirtækin stígi nú fyrstu skrefin í að koma þríleiknum á hvíta tjaldið og eru í viðræðum við norræna handritshöfunda og leikstjóra. Stefnt er að því að myndin verði frumsýnd seinni hluta árs 2014.

Sögusvið bókanna eru Vestfirðir í kringum aldamótin 1900 og skapar Jón Kalman einstakan og heillandi heim þar sem barátta mannsins við náttúruöflin er í forgrunni sem og tilraunir hans við að ná tökum á örlögum sínum með sæmd og reisn.

Jón Kalman þarf vart að kynna en hann hefur hlotið fjölda viðurkenninga fyrir ritstörf sín, hér á landi sem erlendis. Bækurnar í þríleiknum hafa notið fádæma vinsælda og hefur útgáfuréttur þeirra verið seldur til fjölda landa.

„Framleiðendurnir komu að máli við mig og sannfærðu mig um að þeir myndu framleiða kvikmynd sem yrði sjálfstætt listaverk, vissulega byggt á mínum bókum, en alveg sjálfstætt verk með sínum eigin lögmálum." segir Jón Kalman Stefánsson í tilkynningu Bjarts.