Skólameistari rakar sig fyrir UNICEF

Frumleg fjáröflun fór fram í Fjölbrautaskólanum í Garðabæ í dag. Þar söfnuðu nemendur og starfsfólk fjárframlögum til UNICEF með ýmsum uppátækjum, m.a. með því að lita hárið á sér blátt eða krúnuraka sig.

Kristinn Þorsteinsson, skólameistari, lét ekki sitt eftir liggja og rakaði upphafsstafi skólans, FG, í hnakkann á sér gegn minnsta kosti 10 þúsund króna framlagi til UNICEF. Það var nemandi skólans sem varð þess heiðurs aðnjótandi að fá að skrifa í hnakkann á skólastjóranum fyrir augum annarra nemenda.