Málsmeðferð stjórnarskrárfrumvarpsins ófullnægjandi

Fulltrúar Sjálfstæðisflokksins í stjórnskipunar- og eftirlitsnefnd Alþingis mótmæla harðlega málsmeðferð meirihluta nefndarinnar vegna breytinga á stjórnarskrá.

Þeim Birgi Ármannssyni og Ólöfu Nordal þykir uggvænlegt hve stuttur tími er veittur til að skila inn umsögnum um frumvarpið, óskiljanlegt hvers vegna ekki það er ekki sent til formlegrar umsagnar og ófullnægjandi að senda frumvarpið til Feneyjanefndarinnar.

Feneyjanefndin

Ákveðið hefur verið að senda frumvarpið til Feneyjanefndarinnar til umsagnar. Sjálfstæðismennirnir telja að frumvarpinu muni ekki fylgja nægileg gögn. „Sú hugmynd að senda til Feneyjarnefndarinnar aðeins hluta úr greinargerð frumvarps til stjórnarskipunarlaga án nokkurra frekari gagna er alveg ófullnægjandi," segja þau í sameiginlegri yfirlýsingu.

„Það sem við höfum áhyggjur af í því sambandi er fyrst og fremst það að nefndin fái ekki næg gögn og upplýsingar um málið, en vonandi verður úr því bætt. Við höfum hins vegar allan tímann lagt áherslu á að álit Feneyjanefndarinnar eigi að vera viðbót við þá umfjöllun, sem nauðsynlegt er að eigi sér stað hér innanlands - hún getur aldrei komið í stað ítarlegrar og vandaðrar umfjöllunar innlendra sérfræðinga," segir Birgir.

Umsagnarferlið

Frumvarpið verður ekki sent formlega til umsagnar eins og venja er heldur auglýst eftir umsögnum. Það þykir tvímenningunum óskiljanlegt og telja réttast að leita formlega eftir umsögnum.

Frestir

Væntanlegir umsagnaraðilar fá aðeins 14 daga frest til að skila inn umsögnum. Það þykir ekki mikið. „Ófært er að skila inn umsögnum á svo stuttum tíma," segja sjálfstæðismennirnir.

Í útvarpsfréttum Bylgjunnar sagði Valgerður Bjarnadóttir að ekkert væri athugavert við að Feneyjanefndin skilaði inn umsögnum um frumvarpið og að nefndin hafi gefið út álit á stjórnarskrárdrögum fleiri ríkja.