Sprengjumaður dæmdur - of mikil rannsókn að mati dómara

Tæplega þrítugur karlmaður var í gær dæmdur í fjögurra mánaða fangelsi fyrir vopnalagabrot, hylmingu og fyrir brot gegn valdstjórninni. Meðal þess sem fannst á heimili mannsins á Suðurnesjum voru sprengiefni og stórir propan-gaskútar.

Málið komst í fréttirnar fyrr á árinu. Lögreglu hafði verið bent á sérkennilegt athæfi mannsins á Facebook, þar sem mátti meðal annars sjá hann beran að ofan með skotvopn auk þess sem þar mátti finna myndband þar sem hann sprengdi fiskikar.

Þá gaf maðurinn meðal annars til kynna á síðunni að heimilið hans væri útbúið sprengjugildrum. Lögreglan leit málið alvarlegum augum og fékk heimild hjá Héraðsdómi Reykjaness til þess að gera húsleit á heimili mannsins.

Sérsveit lögreglunnar aðstoðaði lögregluna á Suðurnesjum. Þeir brutu sér leið inn og fundu þá manninn inni í stofunni. Þar var hann vopnaður hnífi og otaði honum að sérsveitarmönnunum. Maðurinn var dæmdur fyrir að ógna lögreglumönnunum en honum var talið það til verulegrar refsilækkunar að þarna væri frekar um hræðsluviðbragð að ræða heldur en ógnandi tilburði.

Við húsleit fundust gaskútar, stolin kindabyssa og skammbyssa, sem var ekki löglega geymd, auk þess sem maðurinn var ekki með byssuleyfi. Einnig fundust handjárn úr járni.

Þá fundu lögreglumenn rörasprengju á heimilinu, en að mati lögreglumanns sem bar vitni, var sprengjan virk þegar ráðist var inn á heimilið og hefði getað valdið dauða ef hún hefði sprungið. Fleiri munir fundust sem taldir eru að hafi átt að notast við sprengjugerð. Meðal annars flösku fulla af stálkúlum og um 90 grömm af skoteldapúðri, sem maðurinn hafði aflað með því að taka skotelda í sundur.

Maðurinn var látinn gangast undir geðmat en einn geðlæknirinn sagði meðal annars að maðurinn gæti verið hættulegur í framtíðinni, en engar vísbendingar væru um að hann gæti ekki stjórnað gjörðum sínum, og að ekkert læknisfræðilegt hefði komið fram sem benti til þess að refsing bæri ekki árangur.

Niðurstaða dómara er meðal annars sú að maðurinn hefur ekki áður orðið sekur um ofbeldisbrot, ekkert tjón hafi orðið vegna brotanna og að maðurinn sækir sér aðstoð og er í námi. Að því virtu þótti dómara réttast að skilorðsbinda refsinguna og skal hún falla niður eftir tvö ár haldi maðurinn almennt skilorð.

Að lokum þá telur dómarinn augljóst að virtum rannsóknargögnum, að miklu meira hafi verið lagt í rannsókn málsins „en háttsemi ákærða gaf tilefni til" eins og það er orðað.

Því þykir dómara réttast að tveir þriðju hlutar málsvarnarlauna skipaðs verjanda mannsins greiðist úr ríkissjóði. Máli sínu til stuðnings bendir dómari sérstaklega á rannsókn á skrifum og hugarórum mannsins „sem ekki hafa nein tengsl við þá háttsemi sem hann er ákærður fyrir," eins og það er orðað.