Rukkanir bárust enn eftir andlátið

Konu sem lést í byrjun síðasta mánaðar berast enn rukkanir frá smálánafyrirtæki. Systir hennar segir að þótt sjúkdómur í heila hafi dregið systur hennar út í vítahring smálána og svo til dauða hefði hún líklega ekki uppfyllt skilyrði um niðurfellingu lána. Solveig Björnsdóttir lést 9. október eftir langvinn veikindi sem meðal annars höfðu haft áhrif á dómgreind hennar og minni. Ingibjörg Rósa, systir Solveigar, skrifar grein í Fréttablaðið í dag þar sem hún lýsir samskiptum systur sinnar við smálánafyrirtæki. Hvernig systir hennar reyndi í örvæntingu að fela vandræði sín með því að steypa sér í enn frekari skuldir. "Hún var sjúklingur og fékk svo vírus í heila sem breytti algjörlega persónuleika hennar og hegðun. Þetta hefur sennilega byrjað í vor þótt við höfum ekki uppgötvað þetta fyrr en síðsumars og þá var hún búin að taka mikið af smálánum, í upphafi bara eitthvað smotterí en svo fór hún að taka lán til að borga lán og lendir í þessum vítahring," segir Ingibjörg Rósa. Hún segir fjölskylduna þá hafa áttað sig á því hve veik systir hennar var orðin og hún hafi verið lögð inn á sjúkrahús. Þar hafi smálánafyrirtækin samt enn herjað á hana og síðast hreinsað örorkubæturnar út af bankareikningnum hennar í ágúst. "Og þau eru enn þá að rukka hana. Hún dó 9. október, jarðaförin hennar var 20. október og nýjasta sms-ið er frá 24. október frá Hraðpeningum," segir Ingibjörg Rósa. Hún segir að segir að fjölskyldan ætli sér ekki að greiða lánin og þurfi þess ekki. Fjölskyldur fólks sem er á lífi geti þó verið í annarri stöðu. Foreldrar vilji til dæmis oft ekki að börnin lendi á vanskilaskrá eða líði illa vegna vanskila og séu að reyna greiða af lánunum fyrir þau. Smálánafyrirtækin hafa sagt að hægt sé að fella niður skuldir þeirra sem eru geðfatlaðir framvísi þeir vottorði geðlæknis. Ingibjörg Rósa segir að systir hennar hefði líklega ekki uppfyllt skilyrði smálánafyrirtækjanna, ekki frekar en margir aðrir sem hafi lent í snöru þeirra vegna veikinda eða fíknisjúkdóma. Nú liggur fyrir frumvarp á Alþingi þar sem hert er að starfsemi smálánafyrirtækja og telur talsmaður þeirra að verði það samþykkt óbreytt geri það fyrirtækjunum ófært að starfa. "Ég skora á alþingi að samþykkja þetta frumvarp óbreytt því það er enginn missir af þessum fyrirtækjum."