Tryggingafélagið sker allt við nögl

Bílamálari hjá bílasprautun Suðurnesja segir samskiptin við tryggingafélagið Vís erfið. Hann segir að tryggingafélagið gefi verkstæðinu tæplega færi á að laga þá bíla sem rata inn á verkstæðið almennilega.

Bílamálarinn Viðar Utley tekur þar með undir umfjöllun sem var á Vísi í gærkvöldi um samskipti tryggingafélagsins Varðar við bifreiðaverkstæði. Hann segir sömu sögu að segja af samskiptum sínum við tryggignafélagið Vís.

Tryggingafélögin greiða iðulega fyrir viðgerðir á þeim bílum sem rata á verkstæðin. Viðar segir að mikið sé hugsað um fjárhag tryggingafélagsins og oft fái menn tæpast færi á að gera almennilega við bílana. „Það er allt skorið við nögl," segir Viðar. „Það er bannað að kaupa hitt og þetta í bílana."

Viðar segist þekkja dæmi þess að tryggingafélögin hvetji til þess að verkstæðin kaupi notaða varahluti í nýja bíla. „Ég hef heyrt það að undanförnu að það eru fleiri í svipuðu basli með tryggingafélögin en við," segir hann.

Einelti

„Deildarstjórinn hjá Vís er líka búinn að leggja okkur í algert einelti," segir Viðar. Hann segir að deildarstjórinn hafi mikla andúð á samstarfsmanni Viðars og hafi krafist þess að sá svari aldrei í símann þegar deildarstjórinn hringir. „Tjónaskoðanir frá okkur mega heldur ekki vera undirritaðar af félaga mínum. Deildarstjórinn er að stýra því hvernig ég er að reka mitt fyrirtæki," segir Viðar.

Viðar segir sömuleiðis að Vís hafi gert í því að beina viðskiptum frá verkstæði sínu. Það telur hann gróft brot á almennum reglum sem gilda um tryggingafélög og verkstæði. „Tryggingafélögin mega ekki hringja í fólk og segja þeim að fara á þetta eða þetta verkstæði. Sem bílaeigandi ræður maður alveg hvert maður fer og lætur gera við bílinn sinn," segir Viðar. Hann segir að Vís hafi hringt í bílaeigendur og bannað þeim að skipta við verkstæði Viðars.

Vísir.is óskaði eftir viðbrögðum frá tryggingafélaginu Verði eftir umfjöllun gærdagsins en fékk engin viðbrögð.