Sumarhúsaeigendur velta fyrir sér að höfða mál

Kærunefnd húsamála hefur vísað frá máli sumarhúsaeigenda við Elliðavatn. Þeir þurfa því að kröfu Orkuveitu Reykjavíkur að yfirgefa húsin fyrir áramót. Lögmaður húseigenda reiknar með að málið fari fyrir dómstóla.

Elliðavatn er elsta sumarhúsabyggð á landinu. Fréttastofa greindi frá því í ágúst að um tuttugu sumarhúsaeigendur við Elliðavatn og Helluvatn þyrftu að yfirgefa húsin eftir að Orkuveitan ákvað að framlengja ekki leigusamninga.

Rök Orkuveitunnar eru að húsin þurfi að víkja af vatnsverndarsjónarmiðum.

Sumarhúsaeigendur á svæðinu eru ósáttir við ákvörðun Orkuveitunnar og með aðstoð lögmanns kærðu málið til Kærunefndar Húsamála.

„Hún kom mér mjög á óvart þessi niðurstaða sem var felld um daginn í úrskurði," segir Sveinn Guðmundsson, lögmaður Landssambands sumarhúsaeigenda.

Ný lög um frístundabyggð og leigu lóða undir frístundahús tóku gildi árið 2008.

Þar segir að ákvæði laganna gildi um leigu á lóðum þegar samningur er annað hvort ótímabundinn eða til minnst 20 ára.

Í úrskurði Kærunefndar segir að máli húseigendanna sé ekki hægt að taka til meðferðar vegna þess að samningur þeirra sé aðeins til sjö ára, og lögin gildi því ekki um hann.

„Í aðdraganda þessa nýju laga sem voru sett 2008 þá tók laganefndin þá ákvörðun að allir samningar - hvort þeir voru til eins árs tveggja, þriggja, fjögurra, fimm, fimmtíu, tuttugu eða níutíu ára - allir þessir samningar skyldu falla undir lögin. Hins vegar var það vísiregla til framtíðar að samningar sem yrðu skipaðir niður eftir setningu laganna yrðu annað hvort að vera ótímabundnir eða til tuttugu ára," segir Sveinn.

En Sveinn var sjálfur í laganefndinni.

Þá mótmælir hann því að þetta sé vatnsverndarmál þar sem landið er ekki brunnsvæði, og vegna óánægju húseigenda, „þá tel ég að þetta verði örugglega farið í dómsmál," segir hann.