Beðið eftir Sandy: Kjörbúðir tæmdar í New York

„Það má segja að borgin sé í lamasessi. Við erum í raun ekki farin að finna fyrir veðrinu, en það er sérstaklega flóðahættan sem við höfum áhyggjur af."

Þetta segir Brynjólfur Stefánsson, miðlari hjá Morgan Stanley í New York. Gríðarlegur viðbúnaður er nú á austurströnd Bandaríkjanna vegna komu fellibylsins Sandy en hann nær að landi síðdegis.

„Sjávarmálið við Battery Park er farið að hækka," segir Brynjólfur. „En þetta gerist allt síðdegis og við sjáum til."

Hundruð þúsunda manna hafa þurft að flýja frá þeim strandsvæðum sem fellibylurinn mun fara yfir. Þá er áætlað að um 60 milljónir manna geti orðið fyrir barðinu á veðurofsanum vegna flóða og rafmagnsleysis.

Opinberar samgöngur í New York liggja niðri, flugvellir eru lokaðir og markaðurinn í New York verður að sama skapi lokaður í dag.

Brynjólfur segir New Yorkbúa vera rólega, þó svo að margir hafi ekki mætt til vinnu í dag. Aðallega séu það íbúar við sjávarmálið sem hafi áhyggjur.

„Það er einna helst í kjörbúðunum sem maður sér áhrif Sandy. Fólk er að kaupa mikið af mat — brauði, vatni, grænmeti og rafhlöðum."

„Sjálfur fór ég nú í vinnuna," segir Brynjólfur og bætir við: „Við erum hérna fámennur hópur. Aðrir héldu sig heima í dag."