Ari segir ekkert afskrifað hjá 365

Ari Edwald, forstjóri 365 miðla, segir að það sé ósatt sem fram hafi komið í pistli Páls Magnússonar á Pressunni að 365 hafi fengið afskrifuð lán hjá Landsbankanum.

„Það rétta er að ekki ein einasta króna hefur verið afskrifuð af fjölmiðlarekstri 365. Þvert á móti yfirtóku 365 miðlar obbann af gengistryggðum krónulánum eignarhaldsfélagsins sem átti 365 miðla til nóvember 2008, en þar var fjölmiðlarekstur um 12 % af umsvifunum þegar mest var umleikis. Þessi lán hefðu væntanlega lækkað ella eins og önnur í landinu," segir Ari í pistli sínum sem birtist líka á Pressunni.

Ari segir að 365 miðlar hafi átt frumkvæði að því að setja „kúlulán" í niðurgreiðsluferli og greiða tæpan milljarð króna í afborganir og vexti til Landsbankans á hverju ári. „Þetta veit Páll allt saman því fyrri ósannindum hans um sama efni hefur verið svarað með ítarlegum hætti. Það hlýtur að blasa við að maður sem stjórnast af slíkri heift í garð einstaklinga og fyrirtækja sem oft eru til umfjöllunar í fréttum og hikar ekki við að fara með vísvitandi rangt mál þegar hann telur einkahagsmunum sínum ógnað, er algerlega óhæfur til að ráðskast með allan fréttaflutning og umræður á vegum ríkisins," segir Ari.

Þá bendir Ari líka á að langstærsti hluthafi 365 miðla er Ingibjörg S Pálmadóttir. „Engu að síður kýs Páll að tala um eignarhald 365 miðla eins og Ingibjörg sé ekki til, eða að hún sé aðeins tæki í höndum eiginmanns síns," segir Ari. Hann sakar Pál um kvenfyrirlitningu en segir að hún sé sem betur fer orðin fágæt hjá mönnum í stöðum á borð við þá sem Páll gegni.