Fjögur ár frá neyðarlögum

Í dag eru fjögur ár liðin frá því neyðarlög voru sett í landinu og Geir H Haarde þáverandi forsætisráðherra bað guð um að blessa Ísland í eftirminnilegu sjónvarpsávarpi.

"Góðir Íslendingar, ég hef óskað eftir því að fá að ávarpa ykkur á þessarri stundu nú þegar miklir erfiðleikar steðja að íslensku þjóðinni."

Svona hófst ávarp Geirs H Haarde sjötta október fyrir fjórum árum síðan. Þennan örlagaríkadag voru neyðarlögin sett sem gerði innistæðueigendur að forgangskröfuhöfum í bú bankanna og tryggði þar með tilverugrundvöll nýju bankanna sem stofnaðir voru á grunni hinna föllnu.

Í lok október óskaði ríkisstjórnin síðan formlega eftir samstarfi við Alþjóðagjaldeyrissjóðinn við að koma á efnahagslegum stöðugleika. Alls fékk Ísland lán frá AGS og vinaþjóðum sem jafngilti 540 milljörðum króna auk lántökuréttar frá Norðurlöndum og Póllandi uppá 150 milljarða.

Mánuðirnir í kjölfar hrunsins voru síðan þrautaganga fyrir íslenskt samfélag, milli halli var á rekstri ríkissjóðs, skera þurfti niður á öllum sviðum og skuldavandi heimilanna jókst með degi hverjum.

Mikil reiði blossaði upp meðal almennings sem leiddi til búsáhaldabyltingarinnar alræmdu og stjórnarslita ríkisstjórnar Geirs H Haarde í lok janúar 2009.

Ríkisstjórn Jóhönnu Sigurðardóttur og Steingríms J Sigfússonar hefur síðan haldið í stjórnartaumana og stýrt þjóðinni í gegnum grýttan jarðveg. Nú fjórum árum síðar eru skuldir ríkissjóðs enn miklar, gjaldeyrishöft í landinu og óvissa vegna Icesavemálsins og því ljóst að mikil vinna er enn framundan fyrir íslensku þjóðina.