Di Matteo: Ég geri engar róttækar breytingar

Roberto Di Matteo, stjóri Chelsea, ætlar ekki að gera miklar breytingar á því skipulagi sem færði félaginu tvo titla í lok síðasta. Di Matteo segir að Chelsea ætli ekki að fara spila fótbolta eins og Barcelona þrátt fyrir að hafa keypt nokkra sókndjarfa leikmenn í sumar.

Roberto Di Matteo tók við Chelsea-liðinu af André Villas-Boas í mars, liðið vann 14 af 22 leikjum undir hans stjórn (bara 3 töp) og vann bæði enska bikarinn og Meistaradeild Evrópu.

Roman Abramovich, eigandi Chelsea, hefur verið að setja pressu á að Chelsea spili skemmtilegri fótbolta líkt og Barcelona en það gekk engan veginn upp hjá Andre Villas-Boas og Di Matteo náði sínum árangri með því að falla aftar á völlinn.

„Það verða engar róttækar breytingar. Auðvitað hafa nýir leikmenn áhrif á spilamennsku liðsins því þeir hafa sinn stíl og sinn karakter. Við þurfum hinsvegar að vinna leiki og það er ekki hægt að búast við alltof miklum breytingum í einu," sagði Roberto Di Matteo við Sky Sports.

„Meirihluti liðsins er hérna áfram og þeir leikmenn hafa náð árangri hjá Chelsea. Það vilja allir spila eins og Barcelona en staðreyndin er bara sú að það spilar ekkert lið eins og þeir enda er bara einn Lionel Messi til í heiminum," sagði Di Matteo. Di Matteo fékk tveggja ára samning í sumar en pressan er mikil og ef hlutirnir ganga ekki upp á þessu tímabili er sterkur orðrómur um að Pep Guardiola, fyrrum þjálfari Barcelona, taki við á Brúnni.

Bikarmeistarar Chelsea mæta Englandsmeisturum Manchester City á morgun í leiknum um Samfélagsskjöldinn en leikurinn fer fram á Villa Park á morgun. Leikurinn hefst klukkan 12.30 og er í beinni útsendingu á bæði Stöð 2 Sport og Stöð 2 Sport 2.