Karlmennskan að hverfa í hinum stafræna nútíma

Bandarískur fræðimaður heldur því fram að tölvuleikir, veraldarvefurinn og önnur stafræn tækni raski verulega þroska karlmanna. Þannig sé stór hluti þeirra karlmanna sem nú vex úr grasi ekki í stakk búinn til að takast á við þær kröfur sem nútíma samfélag leggur á þá.

Sálfræðingurinn Philip Zambardo fjallar um þessi mál í bók sinni The Demise of Guys: Why Boys are Struggling and What We Can Do About It. Zambardo er prófessor í sálfræði við Stanford háskólann í Bandaríkjunum.

Zambardo hefur sérstakar áhyggjur af klámi og segir að auðvelt aðgengi að klámfengu efni geti orsakað örvunarvandamál meðal karlmanna. Í kjölfarið eiga þessir menn erfitt með að mynda tilfinningatengsl við aðrar manneskjur.

„Piltar í dag eyða gríðarlega miklum tíma í hinum stafræna heimi," segir Zambardo. „Þetta tekur til margra þátta, allt frá tölvuleikjaspilun til þess að horfa á klám, hanga á YouTube og allt það sem veraldarvefurinn hefur upp á að bjóða."

Afleiðingar þessa ferlis eru margþættar. En birtingarmyndir þess eru þó ávallt tengdar einhvers konar taktleysi karlmanna við nærumhverfi sitt og samfélag.

Hægt er að nálgast viðtal við Zambardo á vef CNN. Þá er einnig hægt að kynna sér fræðibókina hér.