Segir að Jóhanna hafi ekki ætlað sér að virða niðurstöðu kærunefndar

Lögmaður Önnu Kristínar Ólafsdóttur, sem í gær voru dæmdar miskabætur vegna brots forsætisráðuneytisins á jafnréttislögum gagnrýnir yfirlýsingu ráðuneytisins vegna málsins og segir hana líta framhjá mikilvægum þáttum dómsins.

Í kjölfar dómsins í gær sendi ráðuneytið frá sér yfirlýsingu þar sem vakin er athygli á því að í dóminum sé hvorki lagt sjálfstætt né efnislegt mat á því hvort jafnréttislög hafi verið brotin þegar ráðið var í starf skrifstofustjóra í forsætisráðuneytinu. Þórunn Guðmundsdóttir lögmaður Önnu Kristínar segir niðurstöðu dómsins alveg skýra.

„Það er merkilegt í yfirlýsingunni að það er litið framhjá því að niðurstaða dómsins er allveg skýr. Jóhanna braut gegn jafnréttislögum með skipan í þetta skrifstofustjóraembætti. Svo er annað, sem er ekkert minnst á í yfirlýsingunni að ástæðan fyrir því að hún er dæmd bótaskyld eru viðbrögð hennar við niðurstöðu kærunefndar jafnréttismála á sínum tíma."

Niðurstaða kærunefndarinnar var á þann veg að Anna Kristín hefði átt að fá starfið þar sem hún hefði verið jafnhæf hið minnsta.

„Síðan þegar hún fær á sig þennan bindandi úrskurð þá sýnir hún þá ekki auðmýkt að virða bara niðurstöðu kærunefndarinnar og jafnframt tilkynnir hún skipun sérstaks rýnihóps til að fara yfir niðurstöðuna. Hún ætlaði sér ekki að virða niðurstöðu kærunefndarinnar."

Forsætisráðherra vildi ekki veita viðtal þegar eftir því var leitað og segir aðstoðarmaður hennar að yfirlýsing ráðuneytisins segi allt sem segja þarf.