Sonur Puff Daddy spilar ruðning á skólastyrk

Mo money, mo problems söng rapparinn moldríki, Sean "Diddy" Combs einnig þekktur sem Puff Daddy eða jafnvel Diddy, á sínum tíma. Einmitt vegna þess að hann er auðugur gremst mörgum að sonur hans sé á skólastyrk hjá UCLA-háskólanum.

Sonurinn Justin Combs er á leiðinni í skólann þar sem hann mun spila amerískan fótbolta með liðinu en hann þykir vera efnilegur bakvörður.

Mörgum finnst ekki rétt að hann sé að fá 54 þúsund dollara styrk þar sem faðir hans eigi miklu meiri en nóg af peningum.

Skólinn segir aftur á móti að þeir sem fái styrki fái þá vegna hæfileika sinna en ekki vegna þess að þeir þurfi sérstaklega á því að halda. Það sé hreinlega ósanngjarnt að útiloka einstaklinga af því foreldrar þeirra séu efnaðir.