Dramatík í Toulouse - skaut að sérsveitarmönnum og stökk út

Umsátrinu í Toulouse er nú lokið og fjöldamorðinginn Mohammed Merah er látinn. Innanríkisráðherra Frakklands, Claude Gueant, staðfesti þetta fyrir skömmu og gaf nánari útlistun á atburðarrásinni.

Samkvæmt Gueant braust sérsveit frönsku lögreglunnar, RAID, inn um dyr íbúðar Merah í morgun. Þremur handsprengjum var kastað inn í íbúðina áður en sérsveitarmenn ruddust inn.

Merah var þó hvergi að finna. Grunur lék á að hann hefði flúið inn á baðhergi íbúðarinnar. Sérsveitarmennirnir þurftu að hafa varann á enda var talið að Merah hefði skilið eftir sprengigildrur í íbúðinni.

Þegar sérsveitarmennirnir nálguðust baðherbergið hljóp Merah út og hóf að skjóta að lögreglumönnum. Tveir sérsveitarmenn særðust. Talið er að Merah hafi skotið úr hríðskotabyssu.

Gueanta sagði að skothríðin hefði verið hröð og þung. Hann tók fram að meðlimir sérsveitarinnar RAID séu með þeim reyndustu í Frakklandi en þeir hafi samt sem áður aldrei lent í jafn hörðum skotbardaga.

Því næst stökk Merah út um glugga íbúðarinnar. Fregnir herma að hann hafi skotið á lögreglumenn er hann féll úr glugganum. Merah fannst látinn á jörðinni.

Merah hafði lýst því yfir að hann hefði hlotið þjálfun í æfingarbúðum hryðjuverkasamtakanna al-Qaeda.

Rannsóknarmenn fínkemba nú svæðið. Fjöldi fólks er enn á svæðinu en umsátrið stóð yfir í 32 klukkustundir.

Merah er grunaður um að hafa myrt sjö manns á síðustu vikum í suðurhluta Frakklands. Þar af myrti hann þrjú börn við gyðingaskóla í Toulouse.