Snjóflóðahætta á Ísafirði - Almennt ekki að plaga fólk mikið

Íbúar Ísafjarðar eru upp til hópa ánægðir með veðrið í bænum og ekki uggandi yfir snjóflóðahættunni. Þetta segir Albertína F. Elíasdóttir, forseti bæjarstjórnar á Ísafirði.

Almannavarnir lýstu í dag yfir hættuástandi í bænum og þegar hafa sex hús verið rýmd vegna snjóflóðahættu. En þetta hefur ekki dregið bæjarbúa niður að ráði að sögn Albertínu.

„Nei, þetta er ekkert óvenjulegt," segir hún. „Ég veit að það er búið að rýma þrjú hús og þetta er auðvitað leiðinlegt fyrir fólkið sem býr í þeim húsum."

„En þér að segja finnst fólki þetta almennt bara mjög skemmtilegt, semsagt ekki hættustigið heldur snjórinn. Maður sér það bara þegar maður gengur um í bænum," segir hún en nú liggur mannhæðarhár snjór yfir öllum bænum. „Hann féll bara allur í dag. Þetta er eiginlega algerlega magnað. Ég hef ekki séð svona mikinn snjó síðan árið 1995."

Árið 1995 féll reyndar afdrifaríkt snjóflóð á byggðina í Súðavík. Þá týndu 14 manns lífinu. Í dag er hins vegar ekki búið í húsum sem eru á svonefndum hættusvæðum og búið að rýma þau hús sem talin eru í hættu.

Albertína viðurkennir að menn lýsi líklega ekki yfir hættuástandi að gamni sínu. „En ég held almennt að þetta sé ekki að plaga fólk mikið. Einu óþægindin sem fylgja þessu er að komast ekki til og frá staðnum, fyrir þá sem hafa slík plön. Ég held að flestir séu að hugsa þetta. Ég veit til dæmis að systir mín er brjáluð í Reykjavík því hún er bara að missa af snjónum.," segir Albertína.