Skiptar skoðanir um málshöfðun vegna forsetakosninganna

Formaður Öryrkjabandalagsins segir einingu hafa verið um að höfða mál fyrir dómstólum vegna forsetakosninganna innan framkvæmdastjórar bandalagsins. Formaður MND-félagsins er ósáttur - brýnni málum þurfi að taka á en framkvæmd kosninga.

Er það skynsamlegt af samtökum Öryrkja að sóa tíma og peningum í lögfræðikostnað til að ógilda nýafstaðnar forsetakosningar? Þessari spurningu varpaði Guðjón Sigurðsson, formaður MND félagsins, fram í grein í Fréttablaðinu í lok vikunnar.

Í greininni gagnrýnir hann gagnrýnir ákvörðun Öryrkjabandalagsins að höfða mál fyrir dómstólum vegna framkvæmd forsetakosninganna. Fatlað fólk er margt ósátt við að lögum hafi ekki verið breytt og gert þeim kleift að greiða atkvæði í kjörklefa með aðstoðarmanni sínum en ekki fulltrúa á kjörstað eins og núgildandi lög gera ráð fyrir að gert sér.

Telur hann óskynsamlegt af samtökum Öryrkja að veita fé í lögfræðikostnað vegna forsetakosningunum. Ekki síst þegar þingmenn úr öllum flokkum hafa lýst því yfir að þetta verði eitt af þeirra fyrstu verkum á haustþingi til að leiðrétta.

Þá telur Guðjón upp fjölda verkefna sem hann telur brýnni.

Guðmundur Magnússon, formaður Öryrkjabandalagsins, segir að eðlilegt sé að menn hafi skiptar skoðanir á þessu máli. Guðmundur segir að verið sé að vinna að þeim verkefnum sem Guðjón nefnir að séu brýnni.

„Ég tel að þetta sé hluti af því, þetta styrkir mannréttindahlutann í þeim málum. Það er ekki verið að vinna gegn þeim málum eða láta þau sitja á hakanum heldur er þetta liður í því að fá þau í gegn," segir Guðmundur.

Guðmundur segir að hann og framkvæmdastjórn Öryrkjabandalagið hafi metið það svo að þetta mál muni drífa önnur hagsmunamál öryrkja áfram.

„Við höfum bara misjafnar skoðanir, gerum það öll, það eru engir tveir með sömu skoðanirnar og þetta er bara hans álit og ég geri ekki lítið úr því en þetta er mitt og framkvæmdastjórnarinnar að ákveða og við teljum að þetta verði til þess að drífa hin málin áfram."

En telur hann líkur á því að málið muni verða til þess að ógilda kosningarnar.

„Ég ætla ekkert að fara geta mér til um það. Það er algjört aukaatriði í raun, aðalatriðið er að þetta fáist viðurkennt og sé til þess að þetta gerist ekki aftur."