Farsímanotkun veldur streitu hjá bílstjórum

Samkvæmt niðurstöðu viðhorfskönnunar sem Capacent Gallup gerði fyrir Umferðarstofu lét gera fer almennt tillitsleysi mjög í taugarnar á ökumönnum. Þar kemur einnig fram að farsímanotkun annarra ökumanna er streituvaldur hjá bílstjórum.

Umferðaröryggisráð og innanríkisráðherra boðuðu til fundar í dag um þróun umferðaröryggismála síðustu misseri. Ögmundur Jónasson innanríkisráðherra velti þar upp hvort ástæða væri til að hækka sekt við notkun síma við akstur án handfrjálss búnaðar, en í dag nemur sektin 5 þúsund krónum.

Á fundinum voru kynntar niðurstöður viðhorfskönnunarinnar þar sem spurt var um hvað það er í fari annarra ökumanna sem veldur helst álagi hjá ökumönnum.

Almennt tillitsleysi annarra ökumanna fer mest í taugarnar á ökumönnum en 71,8% segja slíka hegðun valda sér helst álagi við akstur. Tillitsleysið getur komið fram með ýmsu móti og má líta svo á að þau atriði sem koma þar næst á eftir séu nánari útlistum á því hvað valdi ökumönnum mestu álagi.

Þar ber hæst „skortur á notkun stefnuljósa" en 66,5% svarenda sögðu það valda sér álagi. 64,6% sögðu of hægan akstur valda sér álagi og farsímanotkun ökumanns olli álagi hjá 37,8% svarenda. Þar á eftir kemur akstur á vinstri akrein en 37% nefndu það atriði.

Það er vert að nefna að tillitsleysi, skortur á notkun stefnuljósa, of hægur akstur og akstur á vinstri akrein er í mjög mörgum, ef ekki flestum, tilfellum afleiðing farsímanotkunar ökumanns.

Farsímanotkun er vaxandi vandamál í umferðinni og ljóst að mjög margir ökumenn láta þá hegðun og afleiðingar hennar fara í taugarnar á sér.

Samkvæmt könnun MMR frá síðasta vori höfðu 83,1 prósent aðspurðra notað farsíma undir stýri tólf mánuðina þar á undan. Algengast var að fólk notaði farsíma fyrir símtöl án handfrjáls búnaðar eða um 71 prósent.