Átta létust - „Við viljum slysalausa umferð“

Átta manns létust í banaslysum í umferðinni á síðasta ári. „Það er vissulega 8 manns of mikið og ég endurtek það sem ég nefndi á umferðarþingi nú í haust að það á enginn að látast í umferðarslysi hjá okkur. Við viljum slysalausa umferð - á sama hátt og við viljum slysalaust flug og slysalausar siglingar," sagði Ögmundur Jónasson innanríkisráðherra á fundi um umferðaröryggi sem nú stendur yfir.

Umferðaröryggisráð og innanríkisráðherra boðuðu til fundarins. Þar er kynnt efni um þróun umferðaröryggismála síðustu misseri, svo sem um þróun banaslysa og annarra slysa í umferðinni, fjöldi brota sem numin hafa verið með hraðamyndavélum á nokkrum stöðum í vegakerfinu, þróun ökuhraða árin 2004 til 2010.

Hlutfallslegur fjöldi banaslysa í umferðinni hér á landi er 2,5 miðað við 100 þúsund íbúa. Samkvæmt bráðabirgðatölum frá öðrum Norðurlöndum er fjöldi látinna þar frá 2,9 og uppí 5,1 á hverja 100 þúsund íbúa.

Mun færri létust í banaslysum á síðasta ári en árið 2009 þegar þeir voru 17. Ef við förum aftar létust 12 árið 2008, 15 árið 2007 og 31 árið 2006 sem var hörmungarár.

Ökumenn hafa bætt sig

Ögmundur tók til nokkur atriði sem hafa mikil áhrif á tíðni banaslysa. „Það sem ræður úrslitum þegar slys eru annars vegar eru bíllinn, umhverfið og hegðun okkar allra í umferðinni, hvort sem við erum ökumenn, hjólreiðamenn eða gangandi. Ég hygg að á öllum þessum sviðum hafi orðið nokkrar umbætur. Ökumenn hafa bætt hegðun sína en á undanförnum árum en Umferðarstofa hefur unnið ötullega að því að fræða vegfarendur um ábyrgð sína og jafnframt hefur nýliðum verið veittur aukinn stuðningur og aðhald í ökunámi og á fyrstu árunum sem þátttakendur í umferðinni. Bílar verða sífellt betri og búnir ýmiss konar tækni sem bjarga okkur ef eitthvað bregður útaf, og síðast en ekki síst hefur í seinni tíð verið lögð meiri áhersla á öryggismál við allar samgönguframkvæmdir," sagði Ögmundur.

Hann benti á að Vegagerðin hefur í samræmi við umferðaröryggisáætlun til dæmis unnið æ meira að umbótum á vegakerfinu, lagað hættulega kafla sem greindir hafa verið út frá gæðamati vega og kafla þar sem slys hafa verið tíð.

Þá sagði Ögmundur að löggæsla hafa fyrirbyggjandi áhrif. „Og til dæmis hraðamyndavélarnar sem grípa okkur hér og þar, í jarðgöngum eða vegarköflum í þéttbýli eða dreifbýli og hert viðurlög hafa hér einnig verið aðhald. Það ásamt öðru hefur dregið úr hraðakstri."

Ökuhraði á sumrin lækkar

Athygli vekur að ökuhraði að sumarlagi hefur lækkað. Þannig var meðalökuhraði á 10 stöðum á Hringveginum 93,4 km á klst. og hefur lækkað úr 97 km frá árinu 2004. Hlutfall ökumanna sem aka hraðar en 30 km yfir leyfilegum mörkum hefur sveiflast nokkuð síðustu árin, lækkað sumstaðar eins og í Eldhrauni og við Pétursey en hækkað við Hvassafell í Norðurárdal og Fagradal.