Sjóvá hirðir hluta slysabóta

Maður sem lenti í vinnuslysi fær aðeins um þriðjung þeirra bóta sem honum voru ætlaðar. Tryggingarfyrirtækið hirðir hinn hlutann og segir ástæðuna þá að fyrirtækið sem maðurinn vann hjá hafi skuldað sér pening.

Í apríl árið 2009 lenti Jóhann Ingi Ármannsson í vinnuslysi þegar hann var við störf hjá BM-Vallá. Við slysið missti Jóhann framan af baugfingri hægri handar auk þess sem hann hefur takmarkað grip eftir slysið og stöðug eymsli, sérstaklega í kulda.

BM-Vallár var með starfsmenn sína tryggða hjá Sjóvá og var metið að Jóhann ætti að fá greiddar tvær milljónir og sjöhundruð þúsund í bætur vegna slyssins.

En þessir peningar skiluðu sér ekki allir til Jóhanns.

„Tryggingarnar tóku 14 hundruð þúsund krónur af bótunum upp í vangoldin gjöld hjá Sjóvá," segir Jóhann Ingi, sem telur sárt að gengið sé á hans réttmætu bætur vegna vanskila annarra.

Þau svör fengust hjá Sjóvá að heimild væri fyrir vátryggingafélög að taka af bótum fólks vegna vangoldinna iðgjalda þess fyrirtækis sem það starfar hjá. Í samtali Stöðvar 2 við lögmann Sjóvár kom þó fram að þessari heimild væri sjaldan beitt enda væri nokkuð kaldranalegt að ganga á bætur fólks vegna vanskila þess fyrirtækis sem það vann fyrir. Ekki væri útséð með að Jóhann þyrfti að sitja uppi með allan skaðann þar sem hann á forgangskröfu í þrotabú BM-Vallár.

Þá segir Ásgeir Lárusson, forstjóri Sjóvár, að í ljósi breyttra forsenda frá því það var gert upp síðasta sumar verði mál Jóhanns tekið upp að nýju innan skamms.

Jóhann er fluttur til Noregs og starfar þar sem bílstjóri á steypubíl. Hann segir starfsorku sína töluvert skerta eftir slysið og þykir leitt að geta ekki verið til sjós eins og hann var mikið áður.

Taka skal fram að BM-Vallá varð gjaldþrota og fyrirtæki sem starfar undir sama nafni í dag er ótengt rekstri gamla félagsins.