Vel hægt að útrýma biðröðum - biðlar til hjálparsamtaka

Það er vel hægt að útrýma biðröðum hjálparsamtaka strax á þessu ári. Þetta segir félagsráðgjafi hjá Hjálparstarfi Kirkjunnar. Stór hluti fólks sem stendur í biðröðum eftir matargjöfum sé ekki í neyð en þurfi ef til vill að læra að fara með peninga.

Vilborg Oddsdóttir, sem hefur umsjón með hjálparstarfi Kirkjunnar innanlands tekur undir með forsetanum, sem sagði í nýársávarpi sínum að biðraðir eftir mat væri smánarblettur á íslensku samfélagi. Hún segir að hjálparstarf kirkjunnar hafi aldrei látið fólk standa í biðröð eftir aðstoð.

„Það hefði átt að vera búið að útrýma þessum biðröðum fyrir löngu. Það krefst samt sameigins átaks hjálparstofnanna þriggja og samstarfs hins opinbera því þetta kostar bæði peninga og hugarfarsbreytingu. Við höfum verið að vinna öðruvísi því við lítum svo á að hjálparstarf sé neyðaraðstoð þegar fólk á ekki í önnur hús að venda en það getur ekki mætt til okkar viku eftir viku og hjá okkur þarf fólk að sýna fram á að það þurfi á aðstoð að halda," segir Vilborg.

Hún bendir auk þess á að hjá þeim starfi félagsráðgjafi sem reyni að aðstoða fólk til að breyta lífi sínu og komast úr þeim aðstæðum sem valda því að það þarf að leita sér aðstoðar.

Hún telur að biðraðir brjóti niður virðingu fólks og hafi eyðileggjandi áhrif á fólk. Þá hafi myndast einhvers konar menning sem skaði fólk í kringum þessar raðir. „Við þurfum að líta öðruvísi á þessi mál og reyna kenna fólk að forgangsraða og hvað er nauðsynlegt og hvað ekki," segir Vilborg.

Hún segir að lægstu launin í samfélaginu séu helsta vandamálið. Erfitt sé að hækka grunnframfærsluna á meðan lægstu launin séu svona lág.

„Ég veit það alveg að þetta fólk þarf ekki allt á hjálp að halda og er ekki allt í neyð heldur líta sumir á þetta sem hluta af framfærslunni."