Vel tekið í hugmyndir um risatónleika á Klambratúni

Umhverfis-og samgönguráð Reykjavíkurborgar ákvað á fundi sínum í síðustu viku að fresta afgreiðslu á erindi Kára Sturlusonar tónleikahaldara. Eins og Fréttablaðið hefur greint frá vill Kári halda veglega tónleikaveislu á Klambratúni næsta sumar.

Hugmyndir Kára eru metnaðargjarnar en hann vill meðal annars girða Klambratúnið af og rukka þar inn. Samkvæmt teikningu, sem var látin fylgja með til umhverfis-og samgönguráðs, er augljóst að Kári hefur ekki eingöngu tónleikahald í huga heldur er gert ráð fyrir leiktækjum og öðrum skemmtunum fyrir alla fjölskylduna.

Hugmyndin er að Klambratún verði lagt undir stórtónleika frá hádegi til miðnættis einn dag næsta sumar.

Í umsögn Sifjar Gunnarsdóttur, forstöðumanns Höfuðborgarstofu, frá 7. september telur hún að miðað við þær upplýsingar sem liggi fyrir sé ómögulegt að veita aðra umsögn en þá að full ástæða sé til að fá ítarlegri upplýsingar um hugmyndina og taka á móti þeim með opnu hugarfari.

Sif nefnir jafnframt Sigur Rósar-tónleikana árið 2006, sem hátt í 20 þúsund manns sóttu, og segir að þeir hafi gengið ákaflega vel fyrir sig, tónleikahaldarinn hafi staðið við allar áætlanir. Kári var einmitt einn þeirra sem stóðu að þeim tónleikum.

Kári Sturluson segir í samtali við Fréttablaðið að hann hafi verið beðinn um frekari upplýsingar, hann bíði einfaldlega afgreiðslu hjá Reykjavíkurborg. Kári segir það liggja nokkuð ljóst fyrir að ef þetta verði að veruleika muni erlend stórhljómsveit verða aðalnúmerið, engin íslensk hljómsveit beri slíka tónleika.

„Hins vegar er rétt að árétta að ég er bara að kanna hvort þetta sé möguleiki og hvort það sé grundvöllur fyrir þessu."

Hugmynd Kára leggst misjafnlega í íbúa hverfisins. Samkvæmt tölvupósti sem einnig var lagður fyrir umhverfis- og samgönguráð kemur fram að einn íbúi hefur áhyggjur af hljóðmengun tónleikahalds.

„Í örfá skipti hafa verið haldnir tónleikar á túninu og hefur það heyrst um allt hverfið," skrifar íbúinn sem býr við Nóatún. Hann segir jafnframt það vera óhjákvæmilega reglu að útitónleikum fylgi mikið drasl og sóðaskapur.

„Foreldrar og börn nota túnið og að mæta þangað til leiks í e-m sóðaskap er bara til þess að við íbúarnir myndum ekki telja okkur lengur geta notað það. Túnið er perla fyrir okkur íbúa sem búum þar og mér finnst frekar að eigi að efla það sem útifólkvang."

freyrgigja@frettabladid.is