Þunguð kona slapp ótrúlega vel frá bílveltum - bíllinn gjörónýtur

Ótrúleg mildi þykir að þunguð kona hafi sloppið nær ómeidd eftir bílveltu á Reykjanesbrautinni síðdegis í gær. Með konunni var eins árs gamalt barn sem var fest í barnabílstól.

Alls fór bíllinn þrjár veltur og er gjörónýtur. Samkvæmt vakthafandi lækni á kvennadeild Landspítalans þykir það ótrúleg mildi að konan, sem var gengin 32 vikur, eða um átta mánuði, hafi sloppið svo vel frá slysinu. Konan meiddist lítillega á höfði en að öðru leytinu til heilsast henni, barni og fóstri ótrúlega vel. Ekkert amaði að árs gamla barninu þrátt fyrir velturnar.

Læknum þótti ráðlegast að halda konunni yfir nótt á spítala svo hægt væri að fylgjast með líðan hennar. Búist er við að hún verði útskrifuð af spítalanum nú síðdegis.

Alls voru tíu einstaklingar fluttir á spítala eftir tvö ótengd umferðaróhöpp á Reykjanesbrautinni síðdegis í gær. Í raun má segja að ellefu hafi verið fluttir á spítala sé fóstur móðurinnar talið með.

Annars vegar lentu tvær bifreiðar í hörðum árekstri. Svo valt bíll konunnar örskömmu síðar. Talið er að bæðin slysin megi rekja til hálku. Launhált var á Reykjanesbrautinni í gær. Lögreglan á Suðurnesjum hefur varað ökumenn við í dag vegna svipaðra aðstæðna á Reykjanesbrautinni og í gær.