Slökkvistarf gengið greiðlegar en 2004

Mun greiðlegar hefur gengið að ráða niðurlögum eldsins í Hringrás núna en árið 2004, segir Jón Viðar Matthíasson, slökkviliðsstjóri hjá slökkviliðinu á höfuðborgarsvæðinu. Hann segir að aðalástæðan sé sú að eldsmatur sé mun minni núna en var þá. Slökkviliðið hefur verið að störfum síðan þrjú í nótt að slökkva eldinn á svæði Hringrásar við Sundahöfn.

„Það er líka búið að gera breytingar á svæðinu. Það er búið að steypa upp skilveggi á milli hráefna ef við getum orðað það þannig. Það auðveldar okkur svolítið okkar starf," segir Jón Viðar. Hann segir jafnframt að það sé meira logn, sem geri slökkvistarf auðveldara, og að vindáttin sé út á haf. Það þýði að ekki hafi þurft að rýma svæðið og þess muni líklegast ekki gerast þörf.

„Við teljum að við séum sloppnir fyrir horn með að þurfa að rýma svæðið. Sem er gott því að árið 2004 þurftum við að rýma að ég held 600 manns," segir Jón Viðar.

Aðspurður segir Jón Viðar að það myndi koma sér mjög á óvart ef Hringrás gæti verið með óskerta atvinnustarfsemi í dag. Hins vegar sé vonast til þess að fyrirtæki í næstu húsum í kring verði með óskerta starfsemi þegar nær dregur hádegi.

Eimskip hefur þegar sent frá sér tilkynningu um að starfsemi Flytjanda verði skert í dag vegna eldsins.