Hildur ætlar ekki að lýsa úrslitaleiknum aftur

„Við erum ánægð með það fá Hamar á heimavelli. Þær hafa verið með yfirhöndina gegn okkur í undanförnum leikjum. Mér finnst við eiga helling inni og það er bara fínt að fá svona sterkt lið strax í undanúrslitum," sagði Hildur Sigurðardóttir fyrirliði KR í dag eftir að dregið var í undanúrslitum Powerade-bikarsins. KR mætir Hamri og Njarðvík fær Keflavík í heimsókn í hinum undanúrslitaleiknum. Leikirnir fara fram 5.-6. febrúar og úrslitaleikurinn er 19. febrúar í Laugardalshöllinni.

„Ég ætla mér allavega ekki að vera að lýsa bikarúrslitaleiknum í sjónvarpi eins og í fyrra - kemur ekki til mála, ég ætla að spila úrslitaleikinn. Við unnum bikarinn fyrir tveimur árum og það er alveg kominn tími á að endurtaka það."

Getum farið alla leið

„Það er gaman að leika gegn KR í vesturbænum og það er alltaf góð stemning þar ef að fólk mætir. KR liðið er með frábært lið," sagði Ágúst Björgvinsson þjálfari Hamars sem er að leika í fyrsta sinn í sögu félagsins í undanúrslitum bikarkeppninnar. „Við töpuðum naumlega gegn KR í úrslitum Íslandsmótsins s.l. vor og þetta verður án efa hörkuleikur. Ég held að við getum farið alla leið og lyft þessum stóra bikar - en það getur allt gerst," sagði Ágúst.



Kallaður Jón Silfur á Suðurnesjunum

„Ég er kallaður Jón Silfur á Suðurnesjunum og ég vonast til þess að geta breytt því í ár," sagði Jón Halldór Eðvaldsson þjálfari kvennaliðs Keflavíkur eftir að ljóst var að Keflavík fékk Njarðvík í undanúrslitum Powerade-bikars kvenna. „Þetta er frábært fyrir Suðurnesin og það verða margir áhorfendur á leiknum. Því get ég lofað," sagði þjálfarinn sem hefur fjórum sinnum farið með Keflavíkurliðið í úrslit bikarkeppninnar en liðið hefur aldrei unnið bikarinn undir hans stjórn.

„Við erum með svipað lið og í fyrra og ég tel okkur vera betri en í fyrra," sagði Jón Halldór.

Frábært að fá heimaleik

„Við fengum heimaleik og það er frábært. Og það var bara bónus að fá Keflavík og gjaldkerinn hlýtur að vera ánægður," sagði Sverrir Þór Sverrisson þjálfari Njarðvíkur. „Við byrjuðum tímabilið af miklum krafti og unnum fjóra leiki af fyrstu fimm. Síðan meiðist miðherjinn okkar Dita Liepkalne og við höfum átt erfitt uppdráttar eftir það. Ég er að vona að hún sé búinn að ná sér en hún er okkur afar mikilvæg. Liðið er ungt en erlendu leikmennirnir í okkar liði hafa spilað vel fyrir liðið og þær hafa hjálpað ungu stelpunum gríðarlega í vetur," sagði Sverrir Þór.