Elfar var seldur á 21 milljón króna

Samkvæmt áreiðanlegum heimildum Fréttablaðsins er kaupverðið á Elfari Frey í kringum 21 milljón íslenskra króna. Þá fá Blikar 40 prósent af söluverði verði hann seldur frá félaginu í framtíðinni.

Einar Kristján Jónsson, formaður knattspyrnudeildar Breiðabliks, segir Elfar Frey vera saklaust peð í skák Breiðabliks og AEK.

Hann sé settur í erfiða stöðu sem sé ekki sanngjarnt gagnvart honum. AEK hafi brotið reglur UEFA með því að ráðskast með leikmanninn í Aþenu. Þeir hefðu ekki sent samingstilboðið hefðu þeir vitað að Elfar Freyr myndi ekki spila gegn Rosenborg.

Arnar Grétarsson, yfirmaður knattspyrnumála hjá AEK og fyrrverandi Bliki, segir að þeir hafi velt fyrir sér málamiðlun að Elfar fengi að spila gegn Rosenborg en það hafi verið úr sögunni þegar ljóst var að Elfar yrði ekki gjaldgengur með AEK í umspilsleikjum félagsins í Evrópudeildinni.

„Blikarnir sögðust vera búnir að tala við KSÍ sem sögðu að það hefði engin áhrif á þátttökurétt hans hjá AEK. Svo kemur á daginn að það er ekki rétt. Hann mátti ekki spila með okkur ef hann hefði leikið með Blikum gegn Rosenborg," sagði Arnar.