Óttast að börn slasist í hyldjúpum húsgrunni

Húsgrunnur við Þverholt 15 sem reglulega fyllist af vatni stendur enn óhreyfður. Íbúar í nágrenninu hafa áhyggjur af börnum að leik á svæðinu en komið hefur verið fyrir dælum sem eiga að sjá til þess að vatnið verði ekki of djúpt.

„Í fyrradag sá ég krakka vera að leika sér vatnið, sem er örugglega tveggja og hálfs metra djúpt þar sem það er dýpst. Þetta er í það minnsta án efa dýpsta stöðuvatnið í miðborg Reykjavíkur,“ segir Þórleifur V. Friðriksson, prentsmiðjustjóri hjá GuðjónÓ í Þverholti.

Fréttablaðið greindi frá hættunni á svæðinu í apríl síðastliðnum þegar ítrekað hafði sést til barna á svæðinu. Þá var margra metra djúpt vatn búið að safnast í grunninum. Þórleifur segir vatninu hafa verið dælt í burtu nokkrum dögum síðar en nú sé það farið að stækka aftur. „Mér líst ekki á þetta, þetta er stórhættuleg gildra,“ segir Þórleifur.

Grunnurinn er að byggingu sem hýsa átti 400 stúdentaíbúðir. Framkvæmdir voru hins vegar stöðvaðar árið 2008 og hefur grunnurinn verið svo til óhreyfður síðan, en hann er girtur af. Byggingafélag námsmanna hugðist standa að framkvæmdunum en svæðið er nú í eigu Landsbankans og í umsjá Regins, dótturfélags bankans.

„Svæðið er núna nýkomið yfir til Regins. Mér skilst að það sé í ágætu standi. Það er afgirt og það er verið að fylgjast með því. Þá eru dælur þarna sem eiga að dæla upp úr grunninum,“ segir Soffía Sigurgeirsdóttir, sérfræðingur á skrifstofu bankastjóra í Landsbankanum.

Magnús Sædal Svavarsson, byggingafulltrúi Reykjavíkurborgar, sagðist í samtali við Fréttablaðið í apríl telja óviðunandi hvernig skilið hefði verið við svæðið. Hann sagðist þó sæmilega rólegur yfir slysahættu á svæðinu, en ekki meira en það.

Landsbankinn hefur reynt að fá samstarfsaðila til að byggja svæðið upp og þá kom til greina að halda áfram með verkefnið eins og það var hugsað en hingað til hefur ekkert komið út úr því.

magnusl@frettabladid.is