FÍB um Kristján: „Hann ber sig karlmannlega“

„Kristján Möller fyrrum samgönguráðherra og baráttumaður fyrir hlutafélaga- og vegatollavæðingu þjóðveganna út frá höfuðborgarsvæðinu er ókátur yfir undirskriftasöfnun FÍB gegn þessu áhugamáli hans og segir félagið standa ófaglega að málum. FÍB hlýtur vitaskuld að þurfa að hugsa vel sinn gang þegar slíkur fagmaður sem hann mælir svo."

Þetta kemur fram í grein á vef Félags íslenskra bifreiðaeigenda undir yfirskriftinni „Kristján Möller segir FÍB vinna ófaglega" þar sem félagið bregst við þeim orðum sem Kristján lét falla í samtali við Vísi í gær um upptöku veggjalda í kring um höfuðborgarsvæðið.

„Hann ber sig karlmannlega og lætur eins og það sé ekkert tiltökumál þótt fólk mótmæli. Fólk sé nú svosem að mótmæla ýmsum hækkunum á þessum erfiðu tímum og það sé bara eðlilegt. Þá fullyrðir hann að 50 til 60 prósent hafi mótmælt í Noregi upptöku vegatolla og þeir hafi nú samt orðið að veruleika þar. Loks leggur hann áherslu á að rangnefni sé að kalla umrædd gjöld vegtolla. Réttara sé að tala um notendagjöld," segir í greininni.

Þá leggur greinarhöfundur út af orðum Kristjáns á þann veg að hann telji að gjöldin verði léttbærari ef þau heita eitthvað annað en vegtollar.

Í samtali við Vísi í gær segir Kristján:

„Aðalatriðið er að Alþingi Íslendinga hefur samþykkt lagafrumvarp sem heimilar samgönguyfirvöldum að stofna félög utan um þessar framkvæmdir, taka til þess lán og endurgreiða þau með útfærðum notendagjöldum, sem ég endurtek að eru algjörlega óútfærð enn sem komið er. Upphæðin liggur ekki fyrr þar til þessar þrjár breytur verða komnar á hreint."

Greinarhöfundur FÍB skrifar að af þessum orðum fyrrverandi samgönguráðherra sem tali eins og hann sé enn samgönguráðherra, sé ljóst „.. að hann ætlar hvergi að hvika frá því markmiði sínu að girða höfuðborgarsvæðið af með vegatollamúr og rýra með því stórlega afkomu og möguleika íbúa Suður-, Suðvestur- og Vesturlands til atvinnu, búsetuvals og ferðalaga um eigið land."

Greinina má lesa í heild sinni hér.

Undirskriftasöfnun FÍB stendur yfir til þriðjudagsins komandi og þegar hafa rúmlega 33 þúsund skrifað undir.