Nágrannar Botox-konunnar: Viðskiptavinirnir ungar erlendar konur

„Það sem ég hef orðið var við er mikill straumur af ungum erlendum konum til hennar," segir einn nágranni botox-konunnar í Hjallahverfinu í Kópavogi. DV greindi frá því í morgun að kona af erlendu bergi brotnu stundaði lýtalækningar í íbúð sinni í Kópavogi. Konan býr í fjölbýlishúsi í Hjallahverfinu.

Konan notar meðal annars efni sem heitir Dysport samkvæmt DV, en í því er efnið Botulinum Toxin A, sem er einnig að finna í bótoxi. Fyrir þjónustuna rukkar hún um 50 þúsund krónur samkvæmt DV. Efnið fær hún frá Úkraínu.

Samkvæmt sérlyfjaskrá mega einungis læknar, sem búa yfir viðeigandi hæfni og hafa sérfræðiþekkingu á meðferðinni, gefa lyfið, og er ávísun lyfsins bundin við sérfræðinga í augn-, taugasjúkdóma-, taugaskurð-, lýta- og húðsjúkdómalækningum.

Nágrannar konunnar hafa orðið varir við sérkennilega starfsemi hennar. Einn granninn sagði við Vísi að hann hefði séð konuna í læknaslopp með grímu fyrir vitum að kveðja konu, hugsanlega viðskiptavin.

Annar nágranni sagðist verða var við talsverða umferð ungra erlendra kvenna sem hann taldi vera á bilinu tuttugu og þrjátíu ára gamlar.

Hann lýsir konunni sem vingjarnlegri manneskju.

„Mig grunaði þetta reyndar ekki. Ég hélt að hún væri að kenna þessum stelpum snyrtifræði eða eitthvað," segir nágranninn sem bætir við að það sé ekkert ónæði af starfsemi konunnar.

„Það er svo sem ekkert slæmt um þetta að segja," segir granninn sem hefur enga sérstaka skoðun á starfsemi konunnar.

Þriðji nágranni konunnar, sem Vísir ræddi við, sagði lítið fyrir henni fara. Granninn sagðist ekki hafa orðið mikið var við starfsemina.

„En auðvitað hefur maður tekið eftir því að konan er útbólgin í andlitinu," segir nágranninn sem telur nokkuð ljóst að konan noti eigin efni.

Vísir greindi frá því fyrr í morgun að konan starfaði sem nektardansmær á Goldfinger fyrir um fimm árum síðan.

Starfsemi konunnar er ekki til rannsóknar hjá lögreglunni á höfuðborgarsvæðinu samkvæmt upplýsingum frá lögreglunni. Ekki náðist í formann Félags íslenskra lýtalækna, né landlækni vegna málsins. Eiginmaður konunnar, sem er íslenskur, vildi ekki tjá sig um málið þegar eftir því var leitað í morgun. Ekki hefur náðst í konuna sjálfa.