Umfjöllun: Valsmenn náðu ekki að endurheimta toppsætið

Valur og Stjarnan gerðu 1-1 jafntefli í 10.umferð Pepsi-deildar karla í kvöld á Hlíðarenda. Valsmenn áttu möguleika á því að komast á toppinn í deildinni en Stjörnumenn komu í veg fyrir það og jafntefli niðurstaðan. Stjarnan var mun sterkari aðilinn í síðari hálfleiknum og Valsmenn voru heppnir að fá stig úr leiknum, en markvörður þeirra Haraldur Björnsson átti frábæran leik og bjargaði þeim oft á tíðum.

Fyrir leikinn í kvöld hafði Valur unnið fimm leiki í röð og á þvílíkri siglingu, en Stjörnumenn unnu sannfærandi sigur, 4-1, gegn Fylki í síðustu umferð. Það mátti því búast við góðum leik í blíðskapar veðri á Hlíðarenda.

Leikurinn hófst með miklum látum, en Pól Jóhannus Justinussen, leikmaður Vals, átti frábært skot í þverslánna strax á upphafsmínútum leiksins sem gaf heldur betur tóninn.

Tíu mínútum fyrir lok fyrri hálfleiks náðu Valsmenn að skora mark sem var réttilega dæmt af vegna rangstöðu, en Christian Mouritsen, leikmaður Vals, komst einn í gegnum vörn Stjörnunnar og kláraði færi vel.

Rétt fyrir lok fyrri hálfleiksins náðu heimamenn að komast yfir með marki frá Jóni Vilhelm Ákasyni sem prjónað sig í gegnum vörn Stjörnunnar og þrumaði boltanum óverjandi framhjá Ingvari Jónssyni, markverði Stjörnunnar.

Staðan var því 1-0 í hálfleik sem varð að teljast sanngjarnt, en Jón Vilhelm hafði átt frábæran fyrri hálfleik og átti markið fyllilega skilið.

Tryggvi Sveinn Bjarnason, leikmaður Stjörnunnar, kom inná í hálfleik og sú skipting hressti heldur betur upp á lið gestanna. Stjörnumenn komu virkilega ákveðnir til leiks og byrjuðu strax að pressa á vörn Valsmanna.

Jöfnunarmarkið kom eftir rúmlega klukkustunda leik þegar Halldór Orri Björnsson, leikmaður Stjörnunnar, vann boltann rétt fyrir innan miðju, tók á rás og lék á hvern Valsmanninn á fætur öðrum sem lauk með fínu skoti rétt fyrir utan vítateig í netið.

Gestirnir réðu lögum og lofum út leiktímann og komust oftar en ekki í algjör dauðafæri, en alltaf var Haraldur Björnsson, markvörður Vals, vel á verði og sá við skotum þeirra bláklæddu.

Þegar meira en þrjár mínútur voru komnar framyfir venjulegan leiktíma fékk Hörður Sveinsson, leikmaður Vals, ákjósanlegt færi en skot hans fór framhjá. Valsmenn voru nálægt því að ræna sigrinum í lokin eins og svo áður hefur gerst í sumar.

Valur komst því ekki á toppinn í Pepsi-deildinni og eru í öðru sæti með 22 stig, einu stigi á eftir KR.

Stjarnan er komið upp í fimmta sæti eftir leiki kvöldsins með 15 stig.

Valur 1 – 1 Stjarnan1-0 Jón Vilhelm Ákason (43.)

1-1 Halldór Orri Björnsson (63.)

Skot (á mark): 6 – 9 (3-3)

Varin skot: Haraldur 3 – 1 Ingvar

Horn: 2 – 14

Aukaspyrnur fengnar:7– 10

Rangstöður: 3-2

Dómari: Gunnar Jarl Jónsson 6