Uggur í útgerðarmönnum

Mikill uggur er í útgerðarmönnum eftir yfirlýsingar Jóhönnu Sigurðardóttur, forsætisráðherra, um breytingar á fiskveiðistjórnunarkerfinu. Þeir óttast að ríkisstjórnin ætli ekki að fara eftir tillögum sáttanefndar í málinu.

Sáttanefnd sjávarútvegsráðherra um endurskoðun laga um stjórn fiskveiða skilaði tillögum í september á síðasta ári.

Meirihluti nefndarinnar lagði til að hin svokallaða samningaleið verði höfð til hliðsjónar við endurskoðun laganna. Útgerðarmenn eru almennt hlynntir þessari tillögu en þeir sem hafa gagnrýnt núverandi kvótakerfi telja hins vegar að samningaleiðin feli ekki í sér neinar grundvallarbreytingar.

Jóhanna Sigurðardóttir, forsætisráðherra, sagði í áramótaávarpi sínu að leiði eigi til lykta deilur um auðlindamál á nýju ári. Ráðherra var ekkert að skafa utan af því í Kryddsíldinni á Stöð 2 á gamlársdag.

„Auðvitað getur það falist í því að við fyrnum kvótann með einhverjum hætti. Við ætlum ekki að hafa þetta þannig að þeir sem eiga kvótann í dag fái að halda honum. Það er það sem við höfum búið við í alltof marga áratugi. Nú þarf að beryta því. Það verður þjóðin sjálf sem fái arðinn af kvótanum en ekki nokkrir sægreifar," sagði Jóhanna.

Þeir útgerðarmenn sem fréttastofa hefur talað við í dag eru uggandi og óttast að ríkisstjórnin ætli að hunsa niðurstöðu sáttanefndarinnar. Þeir vísa meðal annars til þess að forsætisráðherra hafi ekki svarað bréfi fulltrúa útvegsmanna frá því september á síðasta ári þar sem óskað er eftir fundi.

Forseti Farmanna- og fiskimannasambandsins sagði í hádegisfréttum Bylgjunnar að óvissan um framtíðarskipan mála hafi skaðað greinina.

Útgerðarmenn segja að lítill vilji sé til fjárfestingar og menn hugsi sig tvisvar um áður en þeir festa kaup á nýjum búnaði.

Frumvarp um breytingar á fiskveiðistjórnunarkerfinu verður væntanlega lagt fram á Alþingi snemma á þessu ári.