"Nú er það okkar verkefni að útrýma atvinnuleysinu sem hrunið olli“

Það er verkefni Samfylkingarinnar að sjá til þess að fjármálamarkaðurinn fái aldrei aftur eftirlitslítið veiðileyfi á landsmenn þannig að heimili og ævisparnaður fólks verði veðsettur upp í topp og allt lagt undir. Þetta sagði Jóhanna Sigurðardóttir forsætisráðherra á landsfundi flokksins í dag.

Landsfundur Samfylkingarinnar var haldin um helgina í Valsheimilinu við Hlíðarenda. Fundinum lauk síðdegis með stefnuræðu Jóhönnu Sigurðardóttur forsætisráðherra.

„Nú er það okkar verkefni að sjá til þess að fjármálamarkaðurinn fái aldrei aftur eftirlitislítið veiðileyfi á landsmenn, þannig að heimil fólks, vinnustaðir þess og ævisparnaður verði veðsett upp í topp og allt lagt undir," sagði Jóhanna í dag.

Þá sagði Jóhanna að hlúa þurfi að barnafólki og móta nýjan ramma um húsnæðismál heimilanna.

„Öruggt heimili á viðráðanlegu verði er ein af forsendum velferðarsamfélagsins og sú grunnforsenda má ekki verða ofurseld markaðslögmálunum eins og verið hefur."

Þá þurfi að efla menntakerfið og draga úr atvinnuleysi.

„Nú er það okkar verkefni að útrýma atvinnuleysinu sem hrunið olli," sagði Jóhannaþ

Þá sagði hún að móta þurfi velferðarþjónustuna í samræmi við kröfur jafnaðarmanna.

„Heilbrigðisþjónusta á heimsmælikvaðra, stuðningur við fatlaða til sjálfsbjargar, mannsæmandi kjör fyrir lífeyrisþega og þjónusta við hæfi hvers og eins þegar síga tekur á æfikvöldið eru sjálfsögð og eðlileg réttindi í öllum samfélögum sem vilja kenna sig við velferð. Þannig samfélag eigum við að geta byggt upp á Íslandi, enda þjóðin enn meðal ríkustu þjóða heims, þrátt fyrir áföll hrunsins. "