Kvennafrídagurinn í dag

Í dag, 24. október, er kvennafrídagurinn. Þennan dag, fyrir 36 árum, lögðu íslenskar konur niður vinnu til þess að sýna fram á mikilvægi kvenna í atvinnulífinu. Tveir ráðherrar í ríkisstjórninni, þau Jóhanna Sigurðardóttir forsætisráðherra og Guðbjartur Hannesson velferðarráðherra hafa skrifað greinar sem birtast í Fréttablaðinu og hér á Vísi í tilefni dagsins.

Jóhanna vekur máls á því að í  rannsóknarskýrslu Alþingis um bankahrunið hafi verið leiddar líkur að því að fámennisklíkur karla í viðskiptum og stjórnmálum hefðu ýtt undir og magnað hrunið. Samtímis sýni rannsóknir að kynjajafnvægi við stjórn fyrirtækja leiði til betri stjórnunar. Því hafi Alþingi samþykkt að gera fyrirtækjum og lífeyrissjóðum skylt að ekki minna en 40% stjórna þeirra verði skipuð konum í september 2013.