Segir ríkið mögulega skaðabótaskylt vegna gjaldeyrishafta

Sigurður Kári Kristjánsson, þingmaður Sjálfstæðisflokks, telur að ríkið hafi mögulega bakað sér skaðabótaskyldu þar sem lög um gjaldeyrishöft séu ekki nægilega skýr. Þetta kom fram í máli þingmannsins á Alþingi í morgun. Formaður efnahags- og skattanefndar benti á að löggjöfin hafi verið innleidd í tíð ríkisstjórnar Sjálfstæðisflokks og Samfylkingar.

Frumvarp Árna Páls Árnasonar, efnahags- og viðskiptaráðherra, um að festa gjaldeyrishöft í sessi til ársins 2015 hefur verið harðlega gagnrýnt af sjálfstæðismönnum. Gjaldeyrishöftunum var upprunalega komið á skömmu eftir bankahrun en þá var miðað við að tímabundna aðgerð væri að ræða.

Sigurður Kári Kristjánsson, þingmaður Sjálfstæðisflokks, tók málið upp á Alþingi í morgun og taldi að núverandi lög væru ekki nægilega skýr og gætu skapað ríkinu skaðabótaskyldu.

„Því vil ég spyrja háttvirtan þingmann Helga hjörvar hvort lagt hafi verið mat það hversu háa skaðabótaskyldu ríkið hefur bakað sér hugsanlega með því að standa með þessum hætti að reglusetningunni og hvernig háttvirtur þingmaður telur að ríkisstjórn og seðlabankinn eigi axla ábyrgð á því tjóni sem blasir við að ríkisstjórnin og Seðlabankinn hafi bakað ríkinu með þeim hrikalegu mistökum sem virðast vera að koma í ljós.“

Helgi Hjörvar, þingmaður Samfylkingarinnar, sagði að þessi yfirlýsing kæmi á óvart og benti á að gjaldeyrishöftunum var komið á í tíð ríkisstjórnar Geirs H Haarde. Þá hafi meðal annars verið vísað til þjóðaröryggishagsmuna. „Þessi sjónarmið eiga ekki við lengur og þess vegna höfum við lagt fram á þinginu lagaheimild til að skýra skýrlega á um það hvað heimilt er og hvað ekki heimilt er og takmarka reglusetningavald Seðlabankans í þessu,“ sagði Helgi og benti á að þá bregði svo við að Sjálfstæðisflokkur sé „að þvælast fyrir því máli í þinginu.“