Áfrýjun Sion hafnað - Celtic spilar í Evrópudeildinni

Knattspyrnusamband Evrópu hefur hafnað áfrýjun svissneska félagsins Sion og staðfestir að Celtic muni taka þátt í riðlakeppni Evrópudeildar UEFA.

Sion hafði betur gegn Celtic í forkeppni Evrópudeildarinnar í síðasta mánuði. Knattspyrnusamband Evrópu dæmdi hins vegar Celtic sigur í viðureignunum þar sem að Sion notaði ógjaldgenga leikmenn í leikjunum.

Fyrir þremur árum var Sion sett í félagaskiptabann fyrir að semja ólöglega við egypska markvörðinn Essam El-Hadary. Síðan þá hafa dómstólar í Sviss úrskurðað að félagið braut engar reglur og notaði Sion því fimm leikmenn í leikjunum sem hafa verið keyptir á undanförnum þremur árum.

Knattspyrnusamband Evrópu tók hins vegar ekki mark á úrskurði svissneska dómstólsins og dæmdi því leikmennina ólöglega.

Forráðamenn Sion héldu hins vegar áfram að reka málið fyrir svissneskum dómstólum sem enn og aftur dæmdu liðinu í hag. Málinu var einnig áfrýjað til UEFA sem hefur nú staðfest á heimasíðu sinni að áfrýjuninni hafi verið hafnað. UEFA mun svo síðar í dag tjá sig um úrskurð dómsyfirvalda í Sviss.

Celtic mætir Atletico Madrid í fyrstu umferð riðlakeppninnar á fimmtudaginn.